بعد انتصارها على السرطان.. دعاء تطلق تطبيق «شفاء» لتوصيل العلاج للمنازل مجاناً

فى أواخر عام 2016 أصيبت دعاء بسرطان الغدة الدرقية، والذى انتصرت عليه بعد 365 يومًا ذاقت فيها الفتاة الثلاثينية مرارة الجرعات الكيماوية، ولكونها تعيش فى القاهرة بمفردها لم تكن جلسات الإشعاع والكيماوى وحدها المؤلمة، حيث عانت من مشكلة شراء العلاج أون لاين، ومن هنا راودتها فكرة إطلاق تطبيق لمساعدة المرضى فى طلب الأدوية وتوصليها لهم رافعة شعار «من رحم المعاناة يولد الأمل».
«شفاء» هو اسم التطبيق الذى أطلقته دعاء عارف، الحاصلة على ماجستير فى إدارة الأعمال، وتقول: «كنت بطلب العلاج بالتليفون بيجيلى جرعات غلط، ومكنتش بفتكر أوقات الأدوية لأن لسه الحالة جديدة عليا، وكل فترة والتانية بلاقى بعض الأدوية بتنقص فى السوق». وتكمل: «لما دورت لقيت أغلب المرضى وخاصة كبار السن عندهم هذه المشكلة، من أول مريض السكر والضغط لحد مريض الفشل الكلوى والسرطان، من هنا جت فكرة التطبيق اللى كان هدفى منه تسهيل حياة المريض فى الحصول على العلاج».
تطبيق «شفاء» يتيح التواصل المباشر بين المرضى والصيدليات، وعن طريق نظام تحديد مواقع ال(چى پى إس) يصل طلب المريض إلى أقرب صيدلية، وتقول: «المريض بيقوم بعمل scan للروشتة أون لاين، واختيار طريقة الدفع وطلب الأدوية».
وتردف: «طورنا التطبيق بقينا نحدد للمريض يوم فى الشهر حسب إتاحة الأموال معاه، ونوصله بوكس فيه علاجه ومرفق بروشتة مكتوبة على الكمبيوتر فيها مواعيد أخد الأدوية وبنبعت له رسالة كل يوم فى ميعاد الدواء ونقوله دلوقتى الميعاد».
فى غضون ال8 أشهر الماضية استطاعت دعاء برفقة شريكتها رشا راضى، التى تعمل مدرسا مساعدا بطب الأطفال جامعة القاهرة أن تخدما أكثر من 20 ألف مريض بتوصيل الأدوية إلى مقار إقامتهم، تقول دعاء: «المريض عندنا مبيدفعش جنيه فوق سعر الدواء ولا مقابل للخدمة، وحتى التوصيل مجانًا».
وتضيف: «عندنا مهمة فى 2019 عمل أكتر من مليون عملية صرف دواء لأكتر من مليون مريض موجودين فى مصر، وبنحلم بنهاية 2021 يكون التطبيق موجود فى كل صيدليات مصر عشان يسهل على المرضى طلب الأدوية بكل سهولة».
أحمد مصطفى