صور

صور
واحشني حوش المدرسة
وحبة عيال متعبيين ف المرايل
بيحيو العلم
واحشني سن القلم
ورسمة بِكر
فيها الَحرَم
وناس كتير راكعين انما
قلوبهم باصة للسما
واحشني بَصة بطرف عين
لاحلى بنت شفتها
اجمل ما فيها
ضحكة بريئة لمستها
لحظة ما قلت كلام ملخبط
وهي ف ثواني عليا ردت
باربع حروف هزت كياني
واحشني صوت الجرس
واستغماية ف الفصول
وصوت مدير المدرسة
لما اسمعه
يصيبني الخرس
وامتحان مش مفاجئ
اول كل شهر
باسئلة زي البنادق
سيبن" علامة استفهام"
اكمل لاخر النشيد
هات مرادف الكلام
اختر ما بين القوسين
ووقت يفر ف دقايق
واحشني كل ذكرى عشتها
وصورة قديمة اتصورتها
بروزتها وعلقتها
على حيطة فوق مكتبي
كل ما يدوبني الزمن
اخدها ف حضني واضمها