سبحان مغيّر الأحوال. هذه المرة كان الشبح سعيداً كطفل أطلق لأمانيه العنان. وبعد أن كان منطفئا متدلى الكتفين كبطوط حزين، بدا اليوم منتعشا يتألق بالفرحة والسعادة. عانقنى بمجرد أن شاهدنى ثم قبلنى وهو يقول لى: أنا فرحان، فرحان أوى. أنا اتشهرت، وكل ده بفضلك - (قلت فى فضول) إزاى؟ احكيلى بالتفصيل - (قال والسعادة تنط من عينيه): مش حتصدق اللى حصل، أنا بقيت بطل قومى بين الأشباح. لما اتنشر حوارك معايا والأشباح عرفوا إنى اتصلت بعالم البشر حصل حراك اجتماعى وجدل سياسى وسط النخبة فى عالم الأشباح - (قلت فاغرا فمى فى دهشة): إيه الكلام الكبير ده؟ ما انت كنت بتتكلم زيينا! - (قال وهو فخر): معلش.. أنا وضعى اتغير فى المجتمع وبقيت شخصية مرموقة ولازم أقول كلام كبير - (قلت فى عطف): ماشى يا ابوالأشباح، ربنا يسعدك. (قال وهو يبكى من السعادة): إنت مش متصور أنا كنت إيه وبقيت إيه؟. بعد ما كنت فى نظر الأجيال الجديدة مجرد عجوز ممل بيحكى ذكريات مستفزة عن القصور الفاضية والفيلل المهجورة، بقيت فجأة نجم مجتمع خصوصا بعد ما طلعت فى برنامج «الشابحة مساء» وحكيت إنك... - ( قلت مقاطعا): تقصد العاشرة؟ - ( قال مؤكداً): الشابحة مساء يا أخى، بتاع منى الشبحى - (قلت ضاحكا وأنا أضرب كفا على كف): والله العظيم دى حكاية!. إنتم عندكم كمان منى الشاذلى؟ - (قال مصححاً): الشبحى. انطقوها صح بقى - (قلت مبتسما): لأ الشاذلى بقى وكبرت معايا - (قال فى عناد الأطفال): الشبحى، دى عيلة كبيرة معروفة عندنا. إنت إيه فهمك فى عائلات الأشباح؟! المهم أخوك خد راحته فى الكلام. أبديت دهشتى من تأخر اتصالنا مع عالم البشر، وقلت - على لسانك طبعا!! - إنكم بتحبونا وعاوزين تحسنوا العلاقات مع شعب الأشباح الصديق - ( قلت وأنا أكركر من الضحك): آه يا نصاب!. كمل - (قال فى شقاوة): الحوار عمل ضجة لما اتنشر فى جريدة «الشبحى اليوم» – (قلت وعيناى تدمعان من الضحك): قلت إيه وحياة أبوك؟ «الشبحى اليوم»؟ - (قال فى فخر): دى بتوزع نار عندنا- (قلت وأنا أمسح دموع الضحك): يخرب عقلك، كمل. (ناظراً نحوى فى حذر): بصراحة أنا اتورطت فى حاجة وورطتك معايا- (قلت فى قلق): خير؟ - (قال وهو ينكس رأسه): بصراحة أنا أخدتنى الجلالة، وقلت - لا مؤاخذة ما تزعلش منى - إنك من كتر انبهارك بيا توسلت ليا إنى أتنازل وأتكرم وأقبل الترشح لمنصب رئيس الجمهورية!. قلت وأنا أضع يدى على رأسى: يخرب بيتك. إنت اتجننت يا شبح؟. رئيس الجمهورية مرة واحدة! - (قال فى جدية): طب اسمع منى الأول وبعدها احكم. غدا تعرفون ما قاله الشبح.
