الى اختشوا ماتوا و الى يتكسف من مبارك ميجبش منه فلوس

اليوم خرج علينا الرئيس المتخلى -على حد تعبيره- عن السلطة بمقطع صوتى تنفطر له القلوب و تدمع له العيون ...
كم نحن شعب قاسى و مفترى ... اتشككون فى نزاهة الرئيس و عائلته ؟؟!!!
كم نحن شعب ناكر للجميل ... هل ينفى احدكم اننا نعيش احلى ايام الديمقراطية الان ؟؟ كل هذا بفضل المساحة التى اعطاها لنا الرئيس مبارك - كما قال فى احد خطاباته قبل التنحى- من الحرية فى التعبير و الممارسات الديمقراطية
و احنا شعب هنطلع جدعان مش عايزين الفلوس يا ريس
بس برضوا هتتحاكم على الفساد السياسى و المتمثل فى تزوير الانتخابات على كل القطاعات من مجلسى الشعب و الشورى للمجالس المحلية للنقابات ..الخ
و هتتحاسب على فشلك فى التنمية الاقتصادية يعنى قلنا كده ليه الدولار تضاعف سعره من سنة 1981 الى 2011 و ليه القطاع العام اتخصخص و فلوسه راحت فين
و هتتحاسب على انتهاك حقوق الانسان و تعذيب المعتقلين فى امن الدولة او فى السجون المصرية
و هتتحاسب على اضعافك لآليات الجيش المصرى و خنوعك العسكرى و الذى ادى الى مقتل الكثير من الجنود المصريين على الحدود
و هتتحاسب على غلاء الاسعار و انتشار الاحتكار
و هتتحاسب على انتشار البلطجة و استعانة الاجهزة الامنية بالبلطجية
شفت بقى يا ريس احنا شعب جدعان ازاى هنسبلك الفلوس و هناخد حقنا فى الباقى
احنا فعلاً لازم نتكسف من نفسنا كشعب طماع ... فلوس ايه الى بنتكلم فيها
فعلاً يا ريس خطابك فوقنا احنا كنا ماشيين غلط
الفلوس بتروح و بتيجى المهم الرجالة و احنا كشعب مش هنبقى ماديين و مش هنقول عليك حرامى و لا هنشكك فى نزاهتك
بس عايزين بقية حقنا و دم شهدائنا
حسبى الله و نعم الوكيل