عايز.. وعايز

عايز حقى فى المشاركة السياسية.. خطوة بخطوة.. عايز دستور جديد.. مش عايز ترقيع فى بدلة قديمة من سنة 1971.. نفكر فى بكرة، عايز الهوية والحضارة.. وعايز التقدم والحداثة، عايز حرية تأسيس الأحزاب.. لا نريدها عسكرية أو دينية.. الانتخاب ببطاقة الرقم القومى، عايز إيجابية.. عايز المرشح يتأكد إن إنت اللى جيت به للمنصب، وبالتالى تستطيع أن تعزله.. وهذا على كل مستويات الانتخابات، ولازم يقدم لك برنامج عشان تقدر تحاسبه عليه وتتابع تنفيذه.. عايز برلمان قوى زى الحديد.. فاهم دوره فى تشريع القوانين ومراقبة أداء الحكومة وبس!! مافيش عمرة وحج.. مافيش علاج على نفقة الدولة.. مافيش تأشيرات وزراء ووظائف وبيزنس شخصى.. الشعب لن يرحمك!!
عايز كل واحد يقوم بدوره ويؤدى مهمته ويتحمل مسؤوليته.. عايز أشوف فيك يا مصر بكرة وبعد بكرة رئيس وزراء مش موظف، صاحب رؤية ومشروع وحلم للوطن مصر.. عايز خطط خمسية بها أهداف يمكن قياسها ومتابعتها.. مش عايز كلام ولا أحلام، مش عايز نفاق، عايز أقول: «يا شعب مصر.. إحنا فى خطر.. وضعنا صعب.. لازم نموّت نفسنا شغل وشغل وشغل.. ولازم نربط الحزام كلنا بجد.. وأنا أضمن لكم عبور الأزمة فى سنوات قليلة زى تركيا.. وهكذا».. عايز رئيس دولة مصر يشرّف مصر.. عايز العدل ومش عايز المنحة يا ريس.. عايز الاحترام المتبادل بينا كشعب وبينك يا ريس.. مش هاحط صورتك فى المكاتب.. لكن بعدلك.. كل الشعب هايحط صورتك فى القلوب والبيوت والصدور.. إنت مننا وزينا.. وبكرة بعد فترتين وبس هترجع تقعد جنبنا.. على القهوة فى الشارع أو فى النادى.. وهاتحب تسمع مننا.. كتر خيرك يا ريس!!
وأختتم رؤيتى لمصر بكرة وبعد بكرة بكلمة لشباب مصر.. أنتم الأبطال.. أنتم ورد الجناين.. أنتم الأمل لبكرة.. أنتم صنعتم بدمائكم تاريخاً جديداً لوطنكم.. أنتم كنتم سبباً فى إعادة اكتشاف الإنسان المصرى لنفسه.. فحافظوا على مكتسبات ثورة 25 يناير.. عضوا عليها بالنواجذ.. عاشت مصر بكم ومن أجلكم.. حرة مستقلة.. دولة مدنية ديمقراطية عادلة.