طوابير.. طوابير

طويلة طوابيرك يا بلادى من العجوزة للمعادى
كل أزمة نقول اتفكت جات أنابيبها السنادى
واقفة ناس طول النهار ناقصة تشحت بالأيادى
ست حامل خايفة تولد واللى سايبه رضيع ينادى
واحد يقول شغلى معطل وكمان أنا فاتنى معادى
أغيب أجيب الأنابيب عارضة النهارده أو اعتيادى
نفسى ألاقى أى خدمة من غير عذاب أقصى مرادى
ولا شىء مكتوب علينا ودايماً طابورنا فى ازديادى
واللى واخد فوق لا هامه جدى ولا دادى
أنابيبه توصل حد بيته وهو قاعد جوه نادى
بالكوسة يا ابنى يمشى حالك ننسى المبادئ كله عادى
ولاّ الطابور رمز التلاحم والمرور راح يبقى هادى
طوابير لغاز طوابير لعيش مش لاقى وقت أكفى زادى
دا الدعم شىء ملموس حقيقى لحمة وعلاج كافيار زبادى
لو وصلنا أنبوبة تزغرد بنت الحلال تسعد فؤادى
جوزى جاب أنبوبة يا أمه وجات الجيران هنت ولادى
واللى قال جابها بواسطة واللى قال ساكن قصادى
كان صبور طول الطابور استنى دوره غاظ الأعادى
طابورنا طويل حادى بادى من العجوزة للمعادى