كورة × كورة يكتبها : كرم كردى

ماذا يحدث فى الرياضة فى مصر، هل سوف نقسم صفحة الرياضة فى القريب إلى نصفين: نصف رياضة، ونصف حوادث؟! تعالوا معاً نراجع ما يحدث فى آخر سنتين أو ثلاث.. قضايا، تراشق بالألفاظ، خناقات، وأخيراً استقالة على الهواء، وقضية تسجيل وكأنها تخابر.. هو فيه إيه؟!
■ أعضاء مغارة على بابا بيتخانقوا وكل شوية واحد يطلع يقدم استقالته.. وهوب يروح يقابل حسن صقر وتلاقيه راجع فيها، طب يا جماعة قبل ما حد فيكم يعمل بطل ويقدم استقالته، يروح يقابل حسن صقر الأول كى لا يقدمها، وكفاية المصيبة اللى انتم سببتوها للأندية وضياع الملايين عليهم من جراء سوء تناولكم لملف البث الفضائى.. أنا مش عايز أقول حاجة تانية بعدين حد يفهم غلط، لكن اتحاد المغارة الهمام غرّق الأندية وللأسف السادة المحترمين رؤساء الأندية إنضحك عليهم: لجنة سباعية، اجتماع مع الوزير واجتماع مع الغفير،
 وفى الآخر كله أكل البلوظة وحتى اللى كان بيحلم بأى حاجة ماخدش حاجة، وده كله إللى هيدفع تمنه المجلس القومى لما يلاقى رؤساء الأندية واقفين طابور بيتسولوا إعانات من الدولة، وأهو أولها 14 مليون تم دفعها للأندية كمساعدة والبقية تأتى، المهم كل ده من الخلاف وتضارب المصالح، وبعدين يا جماعة عايزين نهدا شوية.. خناقات فى الزمالك من 4 سنين والحمد لله الأمور هديت، هوب تلاقى حسن شحاتة بيعانى من أعضاء مجلس الاتحاد السابق، بعدها خناقة فى النادى المصرى بين المجلس والأعضاء والجماهير وتنتهى بحل المجلس، ولسه لم نفق..
 نلاقى مشاكل وشكاوى بين حسن فريد وسيد جوهر فى نادى الترسانة، كل واحد يكيل للآخر الاتهامات، ويتهمه بالتآمر على إيه، هو فيه إيه؟ يا جماعة نبص للمصلحة شوية، كل ده طبعاً والمشاكل دى كلها، والمباراة الحماسية شغالة بين مرتضى منصور وشوبير شوية تعلى وشوية تهبط، وشوية تحس إنهم تعبوا، لكن المواضيع شغالة.
■ وهوب تلاقى د. علاء صادق بكل شجاعة وعنترية يطلع ويقدم استقالته المسببة من قناة مودرن سبورت على الهواء ولخص ما عاناه فى كلمتين، وطبعاً القناة والعاملين بها لن يسكتوا وأكيد فواصل الرد وتذكير المشاهدين بما قاله علاء فى حق الآخرين سوف تظهر، رغم أن القناة نفسها كانت سعيدة بما يقوله علاء فى السابق، ولكن عندما تتضارب المصالح!