الوزير يفهم أكثر من البنى آدم

ماحدش يدقق معايا النهارده فى الكلام لأنى أصبت من كام يوم بغباء حاد وتأخر فى الاستيعاب.. وللأسف حَبَك المرض ده وأنا باقرأ البيانات العسكرية التى تتوالى كل يوم من غرفة عمليات وزارة التعليم بمناسبة دخول المدارس، الذى يوافق هذا العام موسم أنفلونزا الخنازير.. وأنا بقى هاقول البيانات واللى فاهم يشرح لى وربنا يكرمه.. أول حاجة قالها السيد الوزير فرمان بتقليص عدد الطلاب فى الفصول ليتراوح ما بين 30 و40 طالب!! ما فهمتش..
طيب الفصل اللى فيه ستين أو تمانين تلميذ يتقسم على اتنين وتبقى المدرسة فترتين ماشى.. طيب والفصول التى يتعدى عدد التلاميذ فيها المائة والمائة وعشرة أو خمستاشر هيقلصوها إزاى؟ وهتبقى المدرسة تلات فترات ولا إيه؟ تانى حاجة فرمان بتقليص الحصة الدراسية فى المرحلة الإعدادية إلى 30 دقيقة بدل 45 دقيقة وفى باقى المراحل 60 دقيقة بدل 90 دقيقة!!
رفعت سماعة التليفون وسألت تلاميذ فى إعدادى: الحصة عندكم كام دقيقة؟ قالوا 30 دقيقة!! من زمان الحكاية دى بقالنا سنتين الحصة عندنا نص ساعة.. سألت: سمعتوا عن حصص مدتها ساعة وساعة ونص؟ قالوا - ولا هنسمع.. طنط: إنت كويسة؟ قفلت السكة بسرعة.
تالت حاجة: «سيتم تدريس (ثلثى) مضمون الحصة الدراسية فى المدرسة و(الثلث) الباقى سيكون على هيئة تكليفات للطلاب يعتمدوا فى إنجازها على القنوات التعليمية» مش فاهمة.. أنا أعرف إن المدرس يدخل الفصل ومن غير صباح الخير يكتب التاريخ وعنوان الدرس وتلات أربع نقط وافتحوا الكتاب على صفحة كذا وانقلوا.. ومافهمتش كمان «تكليفات» دى، وبعد يومين فهمت إنها واجبات.
ودى اللى التلاميذ هيعملوها بعد مشاهدة الحصة فى التليفزيون.. بس فيه حاجة حيرتنى جداً.. تفتكروا المدرس هيشرح تلتين الحصة من أول الدرس ولّا من آخر الدرس ولّا يشرح تلت ويسيب التلت اللى فى النص ويشرح التلت الأخير؟ صعب السؤال.. صح؟
عموماً مش مهم، لأن التليفزيون أكيد.. أكيد هيذيع الحصة كلها من غير إعلانات ومادام هيذيعوا الحصة كلها، والحصص كلها فى كل المواد، لزومها إيه بقى المدارس؟ يعنى هى مصاريف وهدوم وكراريس وهدية للأبلة ومواصلات وفلوس عشان نزين الفصل وخلاص؟
حد هيقول لى عشان طابور الصباح وتحية العلم.. مالوش لازمة الطابور لأنه عادة يكون مصحوباً بسيل من الشتائم والزعيق وساعات ضرب بالخرطوم، وهذا ممكن يتسبب فى تحور الفيروس إلى فيروس أنفلونزا البهائم..
يروحوا ليه المدارس بقى؟ حد هيقول لى: عشان المدرسين يصلحوا لهم الواجبات.. سورى التكليفات.. مفيش مدرس بيصلح واجبات.. وهو معقول يقدر يصلح كراسات عشر فصول كل فصل فيه ستين تلميذ.. بلاش تسعين؟
يمكن عشان الأنشطة المدرسية والألعاب؟ ممكن خاصة ويوجد بيان يقول لا إلغاء للأنشطة بتاتاً.. لكن الحقيقة ما حدش بيلعب ألعاب وتسعين فى المائة من مدارس الحكومة مافيهاش حوش.. ولو فيه حوش ما فيهوش ملعب ولو فيه ملعب مافيش كورة.. وباقى الأنشطة؟ زيها زى الألعاب كده.. لازمتها إيه المدارس؟
يمكن عشان الوزراء بيفهموا أكتر من البنى آدمين وهما شايفين إنه لازم، عشان عدة أسباب، منها إن الوزير خصص غرفة للعزل فى كل مدرسة ومعاها «منسق طبى» ماأعرفش يعنى إيه.. وزائرة صحية.. ما أعرفش شغلتها إيه..
منها إنه تشكلت غرفة عمليات فى ديوان عام الوزارة، ومنها إنه تم تجديد دورات المياه فى كل مدارس الحكومة وتوفير خزانات مياه نظيفة وصرف صحى فى مدارس الريف.. تصوروا كل ده اتعمل فى مصر..
أحمدك يارب وتصوروا كمان ماتش مصر وإيطاليا كان فيه مائة ألف متفرج وشوية، وسابوهم كده من غير أى وقاية ولا تحذيرات ولا تقليص لمدة الماتش.. إيه الاستهتار ده؟ كان لازم الماتش يتعمل تلات مرات، كل مرة يشوفه 30 ألف متفرج بس يوووه.. فيه مشكلة..
الأربع أجوان هتتقسم إزاى على التلات ماتشات؟ بسيطة يخلّوا النتيجة 6/3.. كل ماتش إحنا نجيب جونين والطلاينة جون واحد.. فكرة عبقرية ويارب ينفذوها فى الماتشات اللى جاية عشان الوباء جاى.
زى هراس كده.