صدقنى.. أنا أحبك لكن أكثر من اللحمة لأ.. رغم أننى أفرق بصعوبة بين اللحمة الطازة والأرصدة المجمدة.. ومع أننى أحفظ برنامج الحزب فى درجة حرارة الغرفة إلا أن كلمة «لحمة» كسلعة معمرة، لم تذكر فيه صراحة، وربما يأتى ذكرها عند إعادة البرنامج ليلاً.. فالبرنامج يذكر أين تقع مصر، لكنه لم يذكر كيف وقعت، ومع ذلك هناك طرق كثيرة للخروج من الأزمة الاقتصادية، إحداها أن نقدم إغراءات للمسؤولين لزيارة المكسيك، رغم علمى أن نتيجة الزيارة سوف تكون إنشاء اتحاد عام للأنفلونزا (بشر - طيور - خنازير) يرسل برقية يبايع فيها ويؤيد تقديم الساعة، رداً على تخفيض المعونة.. حضرتك بتدخن؟ حضرتك لو بتدخن ابعد السيجارة عن صورتى. فبسبب النار غرقت العبّارة أُم ألف راكب، ثم غرق الحكم أبوسبع سنين وأكله السمك – بديل اللحمة - وارتفع سعره وأصبحنا نخوض آخر الحروب، وهى حرب الثلاث وجبات كما حدث مع عريس «لواحظ» وهو عريس مطعون فيه... عندما تقدم عريس إلى «لواحظ» بنت الحاج مسعود سأل عنه فعرف أن اسمه شوقى كمال عبدالعظيم، ومدون فى بطاقة الرقم القومى باسم فرحات فهمى فرغلى وشهرته «سعيد»، وأن والده توفى متأثراً بالعلاوة فاطمأن عم «مسعود» إلى أن «سعيد» هو العريس المناسب، الذى سيحافظ على ابنته ويتفرغ لها لأنه عاطل ثم جلسوا يتحدثون فى التفاصيل.. فقال العريس: «نسمع طلباتك يا عم مسعود». فقال عم مسعود «بنتى مش أقل من أى بنت ولازم تاكل (3) طقات فطار وغدا وعشا.. فمالت زوجته على أذنه وهمست «إنت عايز تطفش العريس ولا إيه؟ بلاش تغالى وتتشدد كده». فهمس لها مسعود: «إحنا لازم الأول نضرب فى العالى، ولو صفت فى الآخر على غدا بس يبقى كويس علشان نأمِّن مستقبل البنت». فرد عم العريس وهو بدل فاقد الأب «إنت عارف يا عم مسعود ظروف البلد والعريس النهارده بيقدم (طقة) أو (طقتين) بالكتير، ولو مصمم على (3) طقات يبقى تشوف لبنتك عريس عربى من بتوع البترول». فقالت أم العروسة: «خلاص يا سيدى إحنا بنشترى راجل». وقال العريس: «وإحنا بنشترى رغيفين». وأضاف مسعود: على بركة الله، ثم قال العريس فجأة: بس إحنا سمعنا يا عم مسعود إنها كانت مخطوبة دورتين يعنى اتناشر سنة يا ترى سابت العريس ليه؟ قال عم مسعود: «يا ابنى إنت باين عليك على نياتك ومش فاهم حاجة ما هو أى عريس بيقعد دورتين بس؟ فقال العريس: «بس أنا عايز أقعد على طول». فقال عم مسعود «يا سلام يا أخويا بقى عايز تجوعها وتأكلها طقة واحدة وكمان تقعد على طول، يا أخى لامؤاخذة»، ثم أصدر صوتاً طويلاً من أنفه وصرخ فى وجه زوجته: «مستنيه إيه ما تصوتى يا ولية!»). [email protected]
