والنبى يارب

يا رب.. يا رب نكسب النهارده بفارق 3 أهداف.. ولو مكنش «تلاتة».. يا رب نكسب بفارق هدفين.. يا رب لو لعبنا مباراة فاصلة فى السودان نكسب.. يا رب عايزين نروح كأس العالم ونفرح.. يا رب.. إحنا شعب محتاج يفرح.. يا رب إحنا بنموت غرقانين فى «عبارات» ومحروقين فى السكة الحديد وفى مسارح الدولة.. يا رب إحنا بنموت فى طوابير العيش.. يا رب إحنا بنموت فى حوادث طرق..
يا رب ده إحنا بنشرب مياه صرف صحى.. يا رب نوصل كأس العالم.. يا رب الفاكهة والخضروات «مروية» بمياه الصرف الصحى وغير الصحى.. يا رب نوصل كأس العالم.. يا رب اتخنقنا من الزحمة وإشارات المرور والرواتب القليلة.. يا رب اتخنقنا من وعود وتصريحات وردية وحكومة «مش ذكية»..
يا رب نفسنا نروح كأس العالم.. خلاص مش قادرين.. حزب وطنى «كاتم» على نفسنا.. يا رب دول بيعملوا مؤتمر كل سنة.. «بيهرونا» كلام و«لت وعجن».. يا رب نروح كأس العالم.. ولادنا حلوين.. يا رب شايف أبوتريكة وحلاوته.. وأحمد حسن وحماسه.. وفتحى ومجهوده.. وزيدان وحرفنته..وجمعة وصلابته.. وحسنى ورجولته.. يا رب نروح كأس العالم.. الحضرى حلو.. والمعلم حسن شحاتة «قلبه أبيض».. وعندنا كمان «حمص» وعمرو زكى ومتعب ومعوض وأوكا وهانى.. يا رب إحنا غلابة ولعيبتنا «جامدين» و«حريفة» وموهوبين.. يا رب نوصل كأس العالم و80 مليون يفرحوا.. يا رب إحنا مشتمناش حد.. ولا ركبنا صور ل«سعدان» وإنه عروسة.. ولا أزعجنا لعيبة الجزائر..
يا رب نوصل كأس العالم علشان خاطر الغلابة.. اللى فرحتهم أهم من «عشاهم»، وضحكتهم «الطيبة» أحلى من زيادة رواتبهم، و«رضاهم» يصبرهم على «الحكومة ونظيف».. يا رب نوصل كأس العالم.. والنبى يا رب.. ويعنى يا رب لو مش مكتوب نتأهل- الله لا يقدر- وملناش نصيب.. بلاش نموت فى العبارات ولا نتحرق فى القطارات ولا «نوطى» فى طابور عيش.. يا رب لو مرحناش كأس العالم- والنبى ما تقدَّر علينا- بلاش نشرب مياه صرف صحى ولا نأكل خضروات وفاكهة ب«الصرف غير الصحى ولا بالصحى»..
يا رب لو مرحناش كأس العالم.. الزحمة تخف والإشارات تبقى خضرا.. والرواتب تزيد.. يا رب لو مرحناش كأس العالم.. بلاش حكومة «نظيف وطويل».. بلاش مؤتمرات للحزب الوطنى وتصريحات وزراء و«عملنا وعملناهم وهنعمل وبطالة وصرف ومواصلات واستثمارات».. يا رب والنبى لو ما وصلنا «خلص» على الحزب الوطنى.. وخده.. خده على بلد تانية.. والنبى يا رب.