ممنوع الخوف.. الخوف ممنوع

مَلّ من طول سكاته وقرر يقول كل الكلام.. تهون العيشة لو يفضل عايشها ع الهامش والسلام.. لملم يأسه وإحباطه.. عجزه فى حياته وإخفاقه.. ولما نطق.. معرفش يقول إيه غير كلمة.. حرام!!
أوعدك إنى أحاول أقهر يأسى وأصلح جناحى المكسور.. وأوجد فى الظلام بالتفاؤل طاقة من الأمل والنور.. بس أمانة يا طريق.. بلاش تعاندنى أنا والله طيب.. وكل غايتى أرجع من رحلتى مجبور الخاطر ومسرور.. يا بلدى على أرضك كام قلب ضعيف مجروح.. قلوب مليانة كلام لكن خايفة بألمها تبوح.. مهزوم صوت الحق فيكى يا بلدى غرقان فى دمه.. بينتفض فى يأسه زى طير على الأرض مذبوح.. مجنون أنا..
وأحتار لو تسألنى أنا مين.. ماشى وتلاقينى ولا عارف الشمال فين من اليمين.. ولما فى يوم أعقل وألاقى إجابات لكل الأسئلة.. أقول طب وكان مالها بس عيشة المجانين!؟..
لو تحبنى.. إعزفلى لحن يكون مليان شجن.. لحن يهز جدران البيت.. ويهز الروح والبدن.. إعزفلى لحن يغمرنى.. يخدرنى.. ينسينى.. كل شىء حوالينا كان غالى واتباع من غير تمن.. كفاياك خوف ومذلة.. إمتى حتصرخ وتثور؟.. وتنفض غبار الكسل عنك وتبطل تلعب دور المقهور.. كفاياك كلام وشكوى وحتفضل تتكلم لحد إمتى؟..
عمر الكلام ما حيزرع أرض إنت سبتها تبور.. غنوا زمان عن قلب غلبه الخوف فى موال.. غابة عاش فيها أسد قضى عمره يطارد غزال.. وفى يوم مات الأسد لكن الغزال فضل يجرى.. يموت الصياد لكن يموت معاه الخوف.. محال!!
أحمد مهنا