نبيل خلف يكتب : أفلاطون

 .. لسه جنين..
.. وبتقرا عقلى وتفهمه..
.. وعرفت صوتى وبصمته..
.. وإزاى بتسمعنى فى سكوتى..
.. وباسمعك..
.. وزى ما تكون شفتنى..
.. وصفتنى بكلمتين..
.. وشخصيتى..
.. حللتها بجملتين..
.. قوللى بقه..
.. مين علّمك كل الكلام ده..
.. يا أفلاطون..
.. بابا العزيز يا محترم..
.. أنا شغل كل الأبهات..
.. حفظته صم..
.. ما تسمنيش بأى اسم..
.. اخترت اسمى من زمان..
.. ونا لسه نطفة بتتقسم..
.. بلاش وقاحة يا ولد..
.. وقوللى فوراً اسمك إيه..
.. إيش عرفك إنى ولد..
.. يعنى إنت بنت..
.. أنا مش حاقولك جنسى إيه..
.. وإسمى إيه..
.. غير بعد ما اطلع م الرحم..
.. ويمكن أقرر أعيش هنا..
.. حسب مزاجى ورغبتى..
.. حضرتك..
.. عالم بيولوجى وفيلسوف..
.. وثورجى..
.. ولا شيوعى وفوضوى..
.. وبلطجى..
.. ما تقوللى إيه كُنيتك..
.. بطّل زعيق وتريقة..
.. وبلاش تكتر فى الكلام..
.. ماما حتصحى من المنام..
.. ولسه فى بداية حلمها..
.. والحلم ده يا عبقرى..
.. إزاى بتقدر تعرفه..
.. ومخك يا دوب خليتين..
.. ومالكش طبعاً فى الخيال..
.. والمعرفة..
.. عقلك كده ونظرتك..
.. ونا باحترم حريتك..
.. ونا برضه حر..
.. ومش حاقولك حلم ماما..
.. إزاى باعيشه وبافهمه..
.. لو ليه خاطر..
.. قوللى يا بنى كل شىء..
.. قبل ما يقتلنى الفضول..
.. باحلم معاها كل يوم..
.. فى كون جميل..
.. أوسع كتير من الرحم..
.. هوّ الرحم ضيق عليك؟..
.. شفت الرحم بحر ومحيط..
.. ونهر مليان بالسمك..
.. من كل لون..
.. بازرع على شطه النخيل..
.. وبرمله لاخضر بابنى قصر لكل طفل حيتولد..
.. ولعب كتير بتونّسه..
.. وبتحرسه..
.. من عين حسود..
.. من أب قاسى مش لاقيه..
.. ويبخل عليه بحنيته..
.. بتبكى ليه وصوتك حزين..
.. الأبهات ناس طيبين..
.. وللأسف..
.. ما اتعلموش معنى الحنان..
.. من صغرهم..
.. وباختصار هما كده..
.. اتربوا كده..
.. ومش ذنبهم..
.. أمال يا بابا ذنب مين..
.. مقدرش أقول..
.. لو قلت أخاف من الجنون..
.. م الألسنة..
.. والنفسنة..
.. ومن عيون من غير جفون..
.. من أحصنة متوحشة..
.. بوشوش دميمة مكرمشة..
.. حتدوس عليه بالجزم..
.. كفاية كده..
.. خلص الكلام..
.. ونا عايز أنام..
.. شكلك زعلت من اللى قلته واتقمصت..
.. تفرق فى إيه..
.. وحتعمل إيه لو انبسطت..
.. لو عايزنى أعترف بغلطتى..
.. أنا مش حامانع لو قبلت..
.. أنا حاعمل إيه بالاعتراف..
.. لما تخاف من كل شىء..
.. ما اقبلش بابا يكون ضعيف..
.. ونا الجنين البرىء..
.. وف إيدى سيف..
.. أنا مش ضعيف لكن حكيم..
.. ويّا المنافق واللئيم..
.. والمفترى..
.. من غير ما ازعّل أى حد..
.. قررت أعيش هنا فى الرحم..
.. للأبد..
.. من غيرك إنت حاعيش يتيم..
.. من غير سند..
.. بارجوك يا ابنى تتولد..
.. إنت عايزنى أبوس إيديك..
.. وأستسمحك..
.. مقدرش أعيش فى دنيتك..
.. ولا أمشى خطوة فى سكتك..
.. ممكن تموت..
.. من غير ما حتى أودعك..
.. حاموت سعيد..
.. والموت بداية فى كون جديد..