نظر عفركوش إلى وزير الجباية وقد أذهله عرضه أن يعمل ابنه معه مساعدا له فقال له: «بقى أنا أبقى عايز حمادة يشتغل ريس تقوم إنت تقول لى يشتغل مساعد؟.. تعجب منه الوزير ونظر للكبير وقال له: «شوف معاليك أنا شايف إن الجدل مع الجدع ده مش هينتهى على شىء، سيبنى عليه وأنا أرجعه الفانوس تانى بس بعد ما أفكه لعفاريت صغيرة».. فجذبه الكبير قبل أن يسمعه عفركوش وأخذه على جنب وهمس له: «وطى صوتك إنت كمان هتهيج علينا العفاريت مش كفاية التمانين مليون!.. ثم إحنا محتاجين الفلوس منه، أومال هنعمل المشاريع منين».. فابتسم الوزير فى خبث وأجابه: «ولا تحمل هم للحكاية دى.. معاليك ناسى إن الولاد بتوعنا رجعوا الأسبوع اللى فات بالكأس؟».. نظر له الكبير نظرة يملؤها الذعر وسأله: «إنت قصدك إيه؟».. فأجابه الوزير وهو يفرك يديه: «بصراحة أنا كانت عينى عالكاس ده من زمان واللى كان حايشنى إننا كان لازم نرجعه كل سنتين، لكن دلوقت خلاص الكاس بقى بتاعنا وأنا حر فيه».. فقاطعه الكبير مذعورا: «إيه ده إيه ده! إنت ناوى على إيه؟».. فأجابه الوزير بثقة: «أنا بس كل اللى باطلبه من معاليك نروح كلنا نزور رئيس الاتحاد فى يوم وتقوم معاليك وبقية الزملاء تشغلوه بالكلام وأروح أنا بخفة يد مخبى الكاس تحت البالطو ولا من شاف ولا من درى وتانى يوم نروح نبيعه فى الكانتو ولا من شاف ولا من درى».. فعقب الكبير ساخرا: «إزاى كل ده ولا من شاف ولا من درى؟!».. فأجابه الوزير بثقة: «وحتى لو فيه حد شاف ودرى هيحصل إيه يعنى؟ ما احنا ياما بيعنا فى البلد كان عمل لنا إيه اللى شاف واللى درى ؟».. ثم يميل عليه بابتسامة عريضة ويستكمل: «طب إيه رأى معاليك بقى إن أنا أول إمبارح شفت فى المنام إنى بعد ما هأمشى هأخذ وسام!».. فأجابه الكبير: «يا راجل؟!».. فأجابه الوزير: «بينى وبينك أصل المال الحرام ما يضيعش أبدا.. جدى كان دايما يقول كده».. وهنا يتدخل عفركوش فى الحديث: «أنا هافضل مركون كده كتير؟».. فيعود اليه الكبير ومعه الوزير ويقول له الكبير: «يا أخ عفركوش حكاية الرئاسة دى مش سهلة زى ما إنت متخيل دى ليها شروط كتير».. فسأله عفركوش: «زى إيه؟!».. فيقول الكبير: «أولا الرئيس لازم يكون بيصحى بدرى، إنت ابنك بيصحى بدرى؟».. فأجابه عفركوش بخجل: «لأ.. بصراحة هو بيطفى المنبه وينام تانى».. يبتسم الكبير وينتابه شعور أنه سيكسب الجولة مع عفركوش فيضيف: «ولازم يكون بيسوق طيارة، المحروس بيسوق طيارة؟».. يفكر عفركوش ثم يجيبه: «أنا ممكن أخليه يسوق تاكسى بعد الظهر، ينفع؟» فيجيبه الكبير: «يا أخ عفركوش دى مواد صريحة فى الدستور لا يمكن التعديل فيها، وبعدين حكاية الرئاسة دى هيبقى فيه عليها ضرب بالسنج والسكاكين، فكر فى حاجة تانية أحسن».. هنا انفعل عفركوش وأجاب: «إنتم شكلكم كده عينكم عالوظيفة دى وعلشان كده بتقطعوا على حمادة.. شوفوا بقى، أنا عايز أقابل الريس»..لم يصدق الكبير ما سمعه فسأله بذهول: «ريس إيه؟».. فأجابه عفركوش بثقة: «الريس بتاعكم، هو مش عنده موبايل؟»..أجابه الكبير بنفس الذهول: «عنده!».. فاتجه عفركوش للمكتب وأمسك بموبايل الكبير وأحضره إليه وسأله: «مش ده موبايلك؟».. فهز الكبير رأسه إيجابا فقال عفركوش: «خلاص، خذ كلمه وقولهّ عفركوش عايز يقابل فخامتك». ونستكمل الأسبوع المقبل إن شاء الله.
