إخواني يرد علي الجخ : "ولا هيهزنا شتايمك ولا يغيرنا يوم الذم"

نظم أحد شعراء جماعة الإخوان ويدعى حسام خميس قصيدة له ردًا علي قصيدة الشاعر هشام الجخ "أنا إخوان" والتي نظمها مؤخرًا يهاجم فيها جماعة الإخوان والرئيس محمد مرسي.
وقام الشاعر الإخواني بالدفاع عن جماعته وإنتماءه وسرد بعض قصص الإخوان مع النظام السابق ومشاركتهم في الحروب, وختم قصيدته بدعوة الجخ والمصريين بالصلح وبناء مصر .. وإليكم القصيدة ..

أنا اخوان..
وكل المسلمين اخوان مقلتش لأ
ومين يقدر يقول على مسلم انه انشق
ومين يقدر يقول الكل على باطل وهو الحق

أنا اخوان ومن صغري وانا اخوان
وطول عمري..رضعت العز من بدري بايد اخوان
وشايل راسي على كفي عشان ربي,ومش بتهان
لا عمري كنت انا خاين ولا بايع ولا مجرم ولا سجان

أنا اخوان وطول عمري ف وقت الخوف انا الربان
وبعد ما اعدي بحر الصعب انا بتهان
وأفضل برضه انا ساكت ومش غلطان
فميجيش جخ ويقوللي ده انت جبان

أنا اللي حاربت في فلسطين
وسال دمي بقالو سنين
وجف الدمع ع الاقصى
وانا دموعي ليوم الدين
وشقوا صدري بسهامهم
عشان اخوان

برغم الضلمة والعتمة وقفت أثور
وكنتوا تقولوا اخوانجي وعايش الدور
وفاكر انه هيصلح وطن مكسور
ومسمعتش ف يوم ليكم,فضلت جسور
عشان اخوان

أنا اخوان ولا ف عمري في يوم وطيت
ولا أكل الرغيف خلاني جنب الحيط
ولا كان ليا في الصفقات ولا التزييط
وعشت حياتي وشعاري
أنا اخوان

هتشتم يا هشام اشتم ولا بيهم
وتنطح صخرنا براسك وتنزف دم
ولا هيهزنا شتايمك ولا يغيرنا يوم الذم
ولا هنهتم

مكنتش أحب اني اجاريك ف تخاريفك
ولا اني أسلم يوم بتصنيفك
ده مصري بشرطة وده مصري بدون شرطة
وده يا جخ توصيفك..مش الاخوان

ولسه برضه ممدوده ايدينا اليك
ففوق واصحى يا ولد العم مد ايديك
عشان نبني وطنا بجد مش تلبيك
واياك تفتكرني عدو...ده انا اخوان


واليكم القصيدة التي كان قد القاها الشاعر الشاب هشام الجخ "أنا إخوان" ...
قصيدة الجخ "انا اخوان"