كما تدين تدان تنشر على صفحتها ضربونى علشان أسيب المتحرش

نشرت حملة "كما تدين تدان"، اليوم على صفحتها على موقع التواصل الاجتماعي "الفيس بوك" ، واقعة إحدى الفتيات تم التحرش بها وعندما أمسكت بالمتحرش والذي كان رجلا تعدي الخمسين، وانقلب الجميع ضدها وتحولت من مجني عليها الى جانية ، فكيف لها بأن تمسك برجل مثل والدها.
وقاموا بالاعتداء عليها وامساك يدها حتى ينقذوا المتحرش من بين يديها .
وجاء نص الواقعة التي تعرضت لها الفتاة علي لسانها قائلة "ولا الف قانون منع تحرش هيتعمل هيبقي ناجح طالما احنا كدا من جوانا ضربوني عشان أسيب المتحرش اللي مسكته وعايزة أوديه القسم .
نازله من شغلي بمدينه نصر ومشيت 4 دقايق بالظبط عشان أوصل لشارع أحمد فخري عشان أركب وأروح في راجل عنده فوق الخمسين سنة ماشي ورايا وبيقول كلام أوسخ من أي فعل في الدنيا، كبرت دماغي ومشيت استغل أني هعدي الشارع وشدني من البلوزه، وقتها لقيت أن السكوت مش هينفع وعيب عليا أني أسكت عن حقي لفيت له مشي بسرعة جريت وراه وجبته من قميصه وقلت له مش هسيبك غ...ير في القسم,,, فجأة الشارع اللي كان في حاله "الذكور" اللي فيه كلها بقت في محيطي.. الراجل أول ما مسكته قعد يعيط ويقول أنا أسف.. وكل اللي واقفين عمالين يقولوا ليا إزاي تمسكي راجل أد أبوكي بالشكل ده أنتي مش متربية.. بقولهم يعني ساكتين له علي فعله وبتحسبوني عشان بجيب حقي الطبيعي!!! بحاول أمسك في الراجل والناس عماله تخلصه مني.. لقيت واحد بيقولي هو غلطان وأنا معاكي وهنوديه القسم..قولت له طيب.. لقيت شاب تاني ضخم جداً جداً مسك إيدي من الرسغ مكان مانا ماسه الراجل وبيفكها بطريقة عنيفة جداً بمسكه بأيدي التانية راح واحد من اللي واقفين متطوع ومسك إيدي التانية وفكوا الراجل مني وفضلوا ماسكين إيديا أنا لحد ما حد خد الراجل وجري!!!! وبيقولولي أبقي فكري تيجي جنب راجل تاني عشان تتربي.. اللي قالي هروح معاكي القسم بيقوله مش هي اللي غلطانه وأكيد هي مش مجنونه وماشيه تجر شكل الناس.. قاله مهما كان ميصحش تمد إيدها علي راجل.. وبيخبط إيده في بعض وبيقول لاحول ولا قوة إلا بالله هي البنات جري ليها إيه.. إيديا ورمت ومش عارفة أحركها أصلاً زي ما يكون الدم وقف فيها.. ببص حواليا لقيت كل الرجاله اللي واقفه بتشتم وبيرخموا.. وأتحول المنظر من أني مجني عليه لجاني وواحد بيقول تعالوا نجيب الراجل ونقول إنها ضربته!! الراجل اليتيم اللي معايا أو مع الحق بلاش معايا دي شدني من وسطهم ووقفلي تاكسي وقالي أمشي.. وقاللي أنا أسف أني مجبتش ليكي حقك.. ربك ع الظالم ".