شقيق الملحن خالد عادل يعتذر عن الاستغاثة: تامر حسني معانا

قال حسام شقيق الملحن خالد عادل عبر حسام شقيقه الشخصي على موقع التواصل الاجتماعي "فيس بوك": "يا جماعة أنا باعتذر عن الفيديو اللى أخويا الملحن خالد عادل نزله من شوية على صفحته لأن خالد أخويا عنده تسمم دموى حاد بسبب التهاب خلوى حاد برجله الشمال، والتسمم الدموى ده بتكون أعراضه الهذيان وتخيلات وعدم وعي كامل، وخلل في عملية الإدراك والنطق.
وأكد أن تامر حسنى وأخيه حسام حسنى متابع معانا الموقف لحظة بلحظة عشان يتم نقل أخويا إلى الرعاية المركزة وبشكرهم جدااا".
وتابع حسام: "بوجه لهم كل الشكر والتقدير على اهتمامهم بحالة أخويا وباعتذر جدااا على الفيديو اللى نزل من أخويا؛ لأن للأسف كنت سايب معاه الموبايل بتاعه وخرجت أكلم الدكتور لقيت الفيديو نزل وهو بيطلب من اصدقاؤه انهم يقفوا جنبه للأسف هو في حالة لا وعى كامل ومفيش أي إدراك ذهنى عنده".
يشار إلى أن الملحن خالد عادل قال خلال اللايف: "أرجوكم إلحقوني بسرعة، أنا في مستشفى شبرا، تعبان جدا جدا وهما مش عارفين يعالجوني، أرجوكم أنا بموت وحاولت أعمل استغاثة من أصحابي اللي نحوا معرفتش، وامبارح جالي غيبوبة، أرجوكم ممكن تساعدوني أخرج".
وتابع: "فيه مشكلة رهيبة رجلي الشمال مبتمشيش، مش قادر أمشي لو حمشي كنت قطعت السلك ومشيت، لكن مش عارف اتحرك وتعبان جدا ومحدش بيساعدني، أرجوكم إلحقوني ونبي عاوز أمشي أنا مش عايز حد يعالجني حطلع من هنا وأموت لو سمحت أي فنان يساعدني انا في مأزق جامد جدا انا بتهان "
وأنهى الملحن خالد عادل الفيديو باكيا.
كانت آخر تطورات حالته الصحية أن عائلته تنتظر ما يقرره دكتور الجراحة والأوعية الدموية لمعرفة سبب حدوث التسمم الدموي، والهبوط الدائم بالضغط.
ويتم علاج خالد حاليا من وجود المياه على الرئة والقلب مع متابعة مستوى الضغط ونسبة التسمم الدموي بالجسم، وعلاج الالتهاب الخلوي.
وأكد الفنان مصطفى كامل في تصريحات ل"البوابة نيوز" أنه سيتم نقل الملحن خالد عادل غدا لمستشفى الشبراويشي وأن الفنان تامر حسني يتابع حالته.