محمد جمعة يدافع عن مي عز الدين بعد الهجوم على "البرنسيسة بيسة"

دافع الفنان محمد جمعة عن الفنانة مي عز الدين بعد تعرضها للهجوم من قبل رواد السوشيال ميديا بعد دورها في مسلسل "البرنسيسة بيسة"، ونشر جمعة عبر صفحته بموقع التواصل الاجتماعي "فيس بوك" تدوينة تحت عنوان "مي عز الدين البنت الجميلة الجدعة الطيبة اللي كل اللي يعرفها شخصيا بيحبها قوي".
وقال فيها: "الفنانة مي عز الدين امتعتنا كتير قوي بأعمال مثلتها ومش هاعد علشان هما كتير قوي، مي عز الدين من اشطر بنات جيلها ممثلة متمكنة قدرت بمجهودها تكون نجمة صف أول تعمل مسلسلات وأفلام بطولتها وزيها زي أي ممثل طول الوقت بيجتهد على أمل النجاح وحب الناس وده أصعب حاجة فى الشغلانة دي واللي بيشتغل معانا في الوسط يعلم مدى الصعوبة في إرضاء الجمهور".
وتابع: "ممكن تكون السنة دي عملت مسلسل معجبش الناس وده وارد أعظم ممثلين العالم عملوا أعمال مالاقتش نجاح الجمهور ودي سنة الحياة، لكن الأكيد واللي يتفق معايا فيه كل أصدقائنا في المهنة أنها تعبت في هذا العمل وتعبت بجد، لو معجبكش المسلسل ده حقك لكن بلاش تبقي سكينة تدبح بيها موهبة من أهم مواهب مصر".
وتابع: "مي أنا بحبك جدا برغم أننا مش أصدقاء، بحب فنك وبحب إخلاصك لشغلك وتعبك فيه، ومنتظر تمتعينا بعمل جديد السنة الجاية وأنا واثق أنك قد المسؤولية".