تامر حسني: "عيش بشوقك " مش مجهودي لوحدي

سرد الفنان تامر حسني سر نجاح أغنيته الجديدة "عيش بشوقك" والتي كتبها مصطفي حسن ولحنها بلال سرور وقام بتوزيعها بلال سرور وهاني محروس.
وكتب على صفحته علي موقع فيس بوك قائلا: "مساء الهنا.. بجد أنا عايز أشكر صديق عمري وحبيبي المهندس هاني محروس شريك مشوار نجاحي لسبب مهم جدًا القصة من أولها أن جاتلي من فترة كبيرة أغنية من الملحن المتميز بلال سرور والشاعر الراقي مصطفى حسن. وكنت حاببها جدًا ولسة كنت برسم ملامح الألبوم ومكنتش عارف هل أغنيها في ألبوم أو في فيلم أو سينجل وكنت محتار جدًا ومع تصوير فيلمي اتشغلت شويه لحد ما لقيت هاني بيكلمني بيقولي مش انت وصتني أدور على موضوع يهم ويعبر عن الناس الفتره دي وملوش دعوه بالحب. قولتله صح. قالي أنا جايبلك أغنية مش شايف حد غيرك بيغنيها وصرفت عليها من خلال شركتي كلام ولحن وتوزيع.قولتله إبعتهالي لقيتها الأغنية اللي أنا حاببها وكان ليها اسم تاني بس أنا غيرته لما أخدتها المهم حسيت هنا بعلامة وإشارة كبيرة أن الأغنية دي مكتوبلي أغنيها واحترمت جدًا مجهود هاني وشغله على الأغنية من قبل موافقتي ولما سمعت الرؤية مكتملة قولتله أنا اتشرف أنك تنتجلي المحتوى الصوتي للأغنية دي وانا هنتج ڤيديو كليب كبير يليق بالفكرة مع الرائع هادي الباجوري ودخلت الأستوديو وغنيتها وزودت الموال الأخير من عندي لإني حسيت أني عايز قفلة جديدة عليا في الأغنية دي. حبيت أقول بس أني مش لوحدي ورا نجاح الأغنية وأشرحلكم وأشيد بمجهود كل اللي تعبوا فيها وهي أغنية "عيش بشوقك".