دعاء عبد الوهاب ترثي جاهين في ذكراه

في ذكرى ميلاد الشاعر الكبير صلاح جاهين، نشرت الشاعرة دعاء عبد الوهاب، قصيدة تنعيه فيها، جاء نصها كالتالي:
عمى أنا وعم القلوب الطيبة
اللى مشاعره من مشاعرى قريبة
وبكلمته رسم الخطاوى والطريق
وكان دوايا م الجراح المتعبة
دايمًا باحس كأنه صاحبى من زمان
إنه ابويا واخويا.. انه ابن الجيران
أحتار.. ألاقى معاه جواب الأسئلة
لو اخاف.. أحس ما بين حروفه بالأمان
لما يقول يا مصر روحى بتتنفض
أصله عاشقها قبل حتى ما يتولد
وعرفت منه يعنى إيه معنى الوطن
وإزاى شراعه جوه قلبى يتفرد
ولد وبنت.. وصورة.. والليلة الكبيرة
والفلسفة تحسد رباعياته الكتيرة
جوه حكاياته بالاقى نفسى وصاحبتى
بالمريلة الكحلى وزوزو أو أميرة
علمنى اقابل كل لحظة بابتسام
حتى الهموم.. واللا الندم.. حتى الآلام
ده كفاية بس يقولى عن زهر الشتا
بيخلى جرحى ودمعتى برد وسلام