عبدالرحيم علي يكتب: فضائح "نشطاء السبوبة" ومؤامرة الإخوان "فيها لأخفيها"

دائمًا ما تكشف «التسريبات» الخاصة ب«نشطاء» 25 يناير، وجههم الحقيقى، ولهثهم وراء المصلحة والمادة، فأينما توافرت المنفعة فثم وجه «النشطاء»، وبعد أن كشفنا فى الحلقة الأولى الأقنعة التى يختبئ وراءها الدكتور محمد البرادعى، نائب الرئيس السابق، وحقيقته القائمة على أنه ب«100 وش» ووصفه للمصريين ب«الزبالة» فى جلساته الخاصة، يأتى الدور فى ثانى الحلقات على «نشطاء السبوبة».
وتظهر المكالمات تعمد «مصطفى النجار» تشويه زملائه من أجل «السبوبة»، وحديثه مع «أحمد شكرى» عن «الفلوس اللى جاية من برة»، فضلًا عن تسريبات أخرى عن غراميات «عبدالرحمن يوسف» النسائية، وحديثه عن «طلعاته إلى قطر» كى «يلقط رزقه»، فضلًا عن عمرو حمزاوى وإبداء رغبته فى العمل مع جماعة الإخوان.
مؤامرة حل جهاز أمن الدولة
التسريب الأول بين وائل عباس المحرض الدائم ضد الجيش والشرطة والدولة المصرية من الخارج، بغرض تنفيذ مخططات خارجية بتقسيم الشرق الأوسط لدويلات وأولاها مصر، وفتى جوجل الأول وائل غنيم، وخلاله عبر مكالمة هاتفية يناقشون كيف تدار المؤامرة من أجل حل جهاز أمن الدول ودور كليهما فى التحريض للتخلص من الجهاز عن طريق إشاعة الأكاذيب بشأنه، وإلى نص التسريب:
وائل عباس: إيه يا زعيم بقولك إيه.
وائل غنيم: قول.
وائل عباس: والنبى عشان أنا بس مؤدب.. ومش عايز أطلع فى تويتر أعمل حاجة.. ومحتاجك أنت تعملها والنبى.
وائل غنيم: إيه خير؟
وائل عباس: عايز بس الراجل اللى بيخطف الميكروفون.. شفت أنت كلمة البلتاجى الرخم ده اللى كل شويه يخطف الميكروفون من عصام شرف ويقعد يقول حاجات.
وائل غنيم: محمد البلتاجى بتاع الإخوان؟
وائل عباس: آه أنت مشفتش الفيديو بتاع عصام شرف؟
وائل غنيم: لا والله أنا أصلًا كنت راجع من بيروت إمبارح وتعبان، فمشفتش أى حاجة النهارده، أنا لسه فايق من شويه كده.
وائل عباس: كلمة جامدة، كلمة جامدة (فشخ) بصراحة جامد قوي، كلمة يعنى قذرة كل ما يتكلم دقيقة يقوم خاطف منه الميكروفون (يسقط يسقط أمن الدولة) عايزين نعمل عليه كامبين الراجل اللى بيخطف الميكروفون.
وائل غنيم: آه آه.. يعنى أنا شايف البلتاجى لازم يتهزأ شويه.
وائل عباس: البلتاجى راجل محترم سيبك منه الراجل ده كويس جدًا غير بقية بتوع الإخوان وبعدين يا سيدى ما إحنا عايزين نِحِل أمن الدولة برضو.
وائل غنيم: طيب ما أيوه بس كل شويه يخطف الميكروفون.
وائل عباس: معلش معلش خليها عندى أنا ديه.
وائل غنيم: أنت بقيت مؤدب وله إيه؟ هههههههههه.
وائل عباس: البلتاجى تبعى وعلاقتى بيه كويسة وهو راجل محترم يعنى.
وائل غنيم: هههههههههههه.
وائل عباس: لو كان القرضاوى كنت سبيت له الدين.. القرضاوى أنت عارف لكن البلتاجى راجل محترم يعنى.
وائل غنيم: يا عم البلتاجى ده اللى منعنى من الطلوع على المنصة يا عم بس قشطة.
وائل عباس: معلش ما همَّ ليهم ناسهم برضو يعنى معلش.
وائل غنيم: أم.. ماشى يا خوى يلا يلا.
وائل عباس: إيه يا ابنى أنت رحت للدكتور ولا مروحتش؟
وائل غنيم: رحت رحت.. آه بس هى هتقعد معايا أسبوع كده أو 10 أيام كمان.
وائل عباس: آه قالك إيه طيب تشخيص الحالة إيه؟
وائل غنيم: دا مشكلة فى الصدر اسمهااااااااا......
وائل عباس: دا إيه دا عدوى يعنى؟
وائل غنيم: حاجة كده زى الرطوبة فى الصدر خدتها فى أمن الدولة.. أنا رحت على فكرة عملت بلاغ للنائب العام.
وائل عباس: ما أنت المفروض كنت عملت كده من زمان بدل اللى أنت قلته على التليفزيون ومتعذبتش ومتبهدلتش والكلام اللى أنت قلته ده.
وائل غنيم: مش مشكلة، مش مشكلة.
وائل عباس: عايزين نركز على مطلب حل أمن الدولة.
وائل غنيم: لا أمن الدولة ده لازم (نفشخهم).
وائل عباس: آه لازم نفشخهم.
وائل غنيم: آه آه مهو عشان كده لازم الموضوع يتحل، لازم أمن الدولة ده يتحل نهائى، وفكك بقى من الناس اللى بتقولك لأ إحنا محتاجينه والإرهاب ومش عارف إيه والكلام الفاضى ده.. لأ لازم يتحل ودى حاجة الناس كلها متفقة عليها.. وهما سامعين دلوقتى.
وائل عباس: أكيد.. لأن هما أكيد بيتجسسوا علينا.
وائل غنيم: عايزين نراقب برضو الوزير، دا رئيس الوزرا الجديد دا هيجيب مين وزرا ما يتسبش لوحده برضك.
وائل عباس: لا واضح أن العيال بتوع الائتلاف هما اللى اخترعوا اسمه أصلًا الجيش.. ما هما العيال بتوع الائتلاف دول مش نازلين لي من زور أصلًا.
وائل غنيم: دُول ولاد «...».. جنبى واحد منهم آهو.
وائل عباس: طيب يعنى أنا مش نازلين لي من زور، قلهم وائل عباس بيقولكوا بطلوا «...» بقى وانتو مش فاهمين حاجة خلوا الكبار هما اللى يختاروا.
وائل غنيم: لا لا لا لا لا مش هما أنتوا اختارتوا جبريل قال وزير أوقاف أنا حشرشح ليكو لو عملتوا كده «محمد جبريل»!.. فى حد مسمى نفسه ائتلاف إسكندرية بيقولك جبريل وزير أوقاف، وكان فى حاجة تانية برضو اختيار ظريف.
وائل عباس: لا رئيس وزراء كان اختيار ظريف بصراحة.
وائل غنيم: مش أنا راجل معرفوش لسه فمقدرش أحكم عليه، لسه لسه بدرى إن أنا أحكم عليه، أنا معرفش عنه حاجة، بس هو عمومًا كان حزب وطنى يعنى ودى حاجة مش لطيفة قوى يعنى.
وائل عباس: آل إيه؟
وائل غنيم: هو كان حزب وطنى.
وائل عباس: لا لا لا لا لا، مهو أحمد درويش كان حزب وطنى هى الفكرة إن أنت لازم..
وائل غنيم: أنا حطيت لك حاجات عن فاروق العقدة عشان أنت كنت بتقولى فاروق العقدة طلع نضيف، والكلام ده حطيت لك حاجات على تويتر أبقى خش بص عليها.
وائل عباس: هبص عليها دلوقتى يلا.. وخلى الناس تبقى..
وائل غنيم: والعيال بتاعة الائتلاف دى إحنا عايزين نشتغل عليهم شوية عشان ابتدوا هما اللى يقترحوا رئيس الوزرا من غير ما يقولوا لحد.
وائل عباس: مهو دا استهبال يعنى.
وائل غنيم: عاملين همَّا دلوقتى الثورة بروح أمهم.
وائل عباس: اكتب أنت كمان اتبرأ منهم وقول الائتلاف بيتصرف من دماغه وده بيضر.
وائل غنيم: لا لا بص لمَّا يعملوا غلطة.. همَّا لحد دلوقتى معملوش غلطة بس لو عملوا غلطة هعمل كده.
وائل عباس: طبعًا الاقتراحات، والاستئثار يا ابنى باتخاذ القرار والاستئثار بالقعدة مع الجيش والاستئثار بالمقترحات ده غلط طبعًا يا وائل.. هو لسه هيغلطوا.. هما قعدوا أصلًا مع عصام شرف بتاع 3 ساعات تقريبًا.. وقعدوا مع عبدالله جول.
وائل عباس: آه يعنى..
وائل غنيم: بس عبدالله جول منا جتلى دعوة للقعدة معاه وأنا رفضت طيب مبدئيًا يعنى الاستئثار حاجة مش لطيفة خالص يعنى.
وائل عباس: آه يا كبير.. بتمثيل الثورة هما دلوقتى اللى بيمثلوا الثورة، مفيش حد غيرهم، ولمَّا هتيجى تكلم الجيش لو همَّا اقترحوا حاجة غلط على الجيش وتيجى تكلم الجيش، الجيش هيقولك منتوا اللى اقترحتوا هيحصل هيحصل فلازم الموضوع ده يوقف عند حده.
وائل غنيم: ماشى حاضر همَّا هيغلطوا غلطة وهنديهم على دماغهم.
وائل عباس: مش عايزين بس تبقى غلطة كبيرة تبقى غلطة بفورة يعنى.
وائل غنيم: لا مفيش غلطات بفورة خلاص.
وائل عباس: بيتهيألى يعنى..
وائل غنيم: ربنا يستر.
وائل عباس: ماشى يا باشا يلا مع السلامة.
وائل غنيم: سلام.
شائعة إضراب أفراد الجيش
التسريب الثانى، وفيه محادثة جديدة لوائل غنيم وشخص آخر يدعى «أحمد» عن معلومة أتت للأخير بخصوص تنظيم أعضاء الجيش لإضراب بداية شهر مارس.
وائل غنيم: أيوه يا حبيبي.
س: أيوه يا باشا.
وائل غنيم: قول لى أنت قلت لى كلمنى حالًا إيه المشكلة؟
س: كان جالى معلومة فى اللحظة دى معلومة مؤكدة جدًا، إن الجيش فيه إضراب عام فى كل القطاعات يوم 1 مارس، المصدر واللى كان جايبلى المعلومة دى كان جايبلى معلومات كتير قبلها وكانت كلها مؤكدة.
وائل غنيم: إن الجيش نفسه حيضرب؟!
س: آه كل قطاعات الجيش عاملة إضراب يوم 1 مارس هم يعنى مقدمين طلبات برفع المرتبات بشكل معين وقرروا إن هيبقى فيه إضراب فى كل قطاعات الجيش يوم 1 مارس إذا مستجابوش للمطالب دى قيادات الجيش، دى كانت معلومة.
والمعلومة التانية اللى كان قالها لى كمان كان قالها لى فى نفس اللحظة هى معلومة مش مهمة أوى بالنسبة لنا فى الوضع الداخلى بس هى بالنسبة لك إن بحب أقول لك أى تطورات تحصل.. كان حصل تحرشات بين السفن الإيرانية العسكرية التى كانت فى البحر الأحمر فى المياه المصرية مع سفن أمريكية عسكرية كانت بتعدى فى نفس الوقت، وحصل تأهب عام لكل القطع البحرية المصرية التى كانت فى السويس، والقطع البحرية الإسرائيلية فى ميناء إيلات أعلنت برضه التأهب العام، وقررت أنها ستتدخل لصالح الأسطول الأمريكى وبعتت لها رسالة استغاثة.. إضراب الجيش حاجة تقلق بصراحة أنا حبيت أقول لك لأن هو من جهة هو الموضوع يعنى إذا إحنا يعنى هو فيه جانبين فى الموضوع، هو دلوقتى مطالب الضباط ديه غالبًا حيستجيبوا ليها بس الموضوع يعنى فى قلق واضح إنه داخل الجيش فى حاجات إحنا منعرفش عنها حاجة ده من جهة، وجهة تانية أنا مش عارف بقا اللى إن إحنا دلوقتي بالنسبة لنا عندنا بعض المطالب ماهى دى فرصة إن أنت تقول مطالبك بشكل أقوى يعنى.
وائل غنيم: لأ أنا.. أنا دلوقتي طلعت خلاص من المشهد ده يا.. أنا طلعت خالص من المشهد يا أحمد ومش عاوز أدخل تانى بقى وسيب الناس السياسيين همّا يقطعوا فى بعض.
التسريب الثالث: مكالمة لوائل غنيم مع شخص مجهول يدعى «خالد»
وائل غنيم: آلو.. أيوه يا خلّود.
خالد: إيه يا وائل عامل إيه.. إيه أخبارك؟
وائل غنيم: كلمنى جمال عيد بتاع الشبكة عارفه؟
خالد: آه عارفه طبعًا.
وائل غنيم: عايز يكتب الستورى بتاعت اللى حصل لى من غير ما يقول اسمى.. هيقول شاهد عيان بيحكى اللى حصل بالضبط.. إيه رأيك بقى؟
خالد: يااا سلام! أومال أنا بعمل إيه.. قوله خالد بيعملها.
وائل غنيم: لا لو سمحت من فضلك متعملهاش.. أنت بالذات لا لأن الناس عارفة إن أنا وأنت صحاب.. من فضلك لا.
خالد: يا ابنى أنا عندى كل التفاصيل.
وائل غنيم: لا متعملهاش خالص.. أنت بالذات هتضرنى أكتر بكتير لو عملتها.
خالد: أنا مش هعملها دلوقتى.. هو عايز يعملها كده كلقطة سريعة يعني.
وائل غنيم: عايز يكتب يقول إنتوا لو من غير سلطة وبتعملوا كده فى الناس..
خالد: هو عايز إيه أنا مافهمتكش كده.. هو عايز ياخد لقطة معينة ويشتغل عليها.
وائل غنيم: الإخوان منعوا الناس.. هو مالوش دعوة بوائل غنيم.
خالد: هو عايز ياخد اللقطة دى بس بتاعت إمبارح.
وائل غنيم: آه.
خالد: أنا بحسب عايز ياخد القصة كلها من أولها لآخرها فحيعرف اللى فيها.
وائل غنيم: لا لا لا هو مالوش فيها لا لا.. إيه رأيك؟
خالد: بس خد بالك.. أنا بلاش عشان أنت كده هتعادى الإخوان.
وائل غنيم: لا أنا ماليش دعوة هو اللى عايز يعمل كده.. أنا أصلًا اسمى مش هيتذكر.
خالد: اسمك مش هيتذكر ماشى بس خد بالك.
وائل غنيم: اسمى مش هيتذكر إن أنا قلت حاجة.. همّا عندهم شاهد عيان.
خالد: ماشى أهم حاجة خد بالك.. خليك حريص مع الإخوان.. جزء كبير من الضرب اللى حواليك من الإخوان.. لازم تفهم اللعبة ماشية إزاي.
وائل غنيم: قول لي.
خالد: الضرب اللى حواليك من الإخوان.. الإخوان بعد ما القصة انتهت عايزين الكريدت يبقى ليهم.. عشان يقولوا لمصر «إحنا حررنا يا إما شاركنا فى التحرير».. فأى حد بيبان بصورة كبيرة ده ضد فكرتهم، وأنت بنت بصورة كبيرة.. وهمّا عايزين يكونوا موجودين فى الصورة.
التسريب الرابع وفيه محمد عباس، عضو ائتلاف شباب الثورة، وأحد النشطاء السياسيين يدعى «عمر»، يتحدثان عن تعاونهما مع الإخوان من أجل إنشاء حركة سياسية.
محمد عباس: إيه يا عمر السلام عليكم.
عمر: بقيت تشوف نمرتى مبتردش عليا عليكم السلام.
محمد عباس: لا والله العظيم مكالمات من ساعتها.. والله العظيم مكالمات من ساعتها.
عمر: أنا عايز أسألك سؤال مهم واستراتيجى جدًا.
محمد عباس: اتفضل.
عمر: فى حزب.. فى ائتلاف حصل اسمه ائتلاف الشباب، ثورة الشباب؟
محمد عباس: ائتلاف شباب الثورة.
عمر: ده حزب ولا جمعية ولا ائتلاف.. ولا إيه ده؟
محمد عباس: شباب الإخوان و6 إبريل والحملة الشعبية لدعم البرادعى وحزب الجبهة.. والعدالة والحرية والجمعية الوطنية للتغيير هيعملوا ائتلاف.
عمر: إيه اللى أنا بشوفه ع الفيس بوك ده.. حزب شباب ثورة التحرير 25 يناير؟
محمد عباس: ما هو ده اللى أنا خبطت فيه النهارده فى التليفزيون.
عمر: يعنى إيه خبطت؟
محمد عباس: قلت له قلت يعنى.. ليس من حق أحد أن يتحكم فى الثورة أو أنه يعمل حزب به اسم 25 يناير أو اسم الثورة أو اسم التحرير.
عمر: يعنى إيه يعنى إيه.. الواد وائل مش من حقه؟
محمد عباس: وائل مش هيعمل تمام.. وائل كان مسوقًا وليس فاعلًا عشان نبقى واضحين.. وائل كان مسوقًا للأحداث اللى إحنا خططناها وليس فاعلًا فيها.