في عشرين خطوة .. إزاي تلحق تراجع قبل الامتحانات؟

1- لو عندك تاسك تاخد دقيقتين فى أقل.. انسى فكرة التخطيط ليها واعملها حالًا واخلص منها أو بمعنى آخر اتخلص منها.
2- لو عندك تاسك تتعلق بالمذاكرة أو الخطط والبحث عن معلومات أو research أو كتابة استخدملها ال Pomodoro Technique.. وده بوست بيتكلم عنها: http://goo.gl/vUVz5W.
3- لو عاوز تداوم على حاجة اربطها بوقت محدد زى أول ما تصحى من النوم أول ما ترجع من الشغل كل يوم الصبح فى المترو، أنا خلصت كورس أونلاين كاملا فى المترو كل يوم الصبح.
4- طريقة من طرق استعادة المعلومات اللى بقالك اكتر من سنة مبتستخدمهاش، إنك تدى المعلومات دى لحد تانى.. وانتوا الاتنين كسبانين وهتندهش إزاى العلم اللى ربنا رزقك بيه انت مش مدرك أهميته غير لما تلاقى حد تانى احتاجله وفرق فى حياته وكنوع من رد الجميل للى ساعدك لازم تساعد حد تانى.
5- البركة فى البكور، بكل ما تعنيه الكلمة من معنى فعلا.. اليوم لما بتبدأه من بدرى بيفرق جدا وبتحسه أطول من العادى «وده تحدى كنت عملته قبل كده عن الموضوع ده: http://goo.gl/DlJAhj».
6- ساعتك البيلوجية دقيقه جدًا، انا اكتشفت انى بنام 7 ساعات بالدقيقة لدرجة انى لو نمت 11:50 بصحى 6:50 من غير منبه.. حاول تعرف انت بتنام كام ساعة بالظبط وظبط نومك هيفرق جدًا معاك.
7 - استخدم evernote على الويب والموبايل والتابلت.. انا عن نفسى جربت حاجات كتير جدا جدا وانا اكتر حد شوفته بيجرب apps.. ايفرنوت أثبت إنه الأفضل على الإطلاق ببساطته المتناهيه وإمكانية إنك تعمل عليه اللى انت عاوزه، اصبر بس شوية وقرر تستخدمه فى كل حاجة.. هتبطل تشيل أى نوتس أو أوراق.
8 - الأفكار اللى بتيجى كتير جدا.. بس مش معنى كده إن كلها يتعمل.. الواحد زى ما بيضحى بوقته ومجهوده عشان فكرة ممكن كمان يضحى بأفكار تانية عشان الفكرة دى.
9 - طاقتك مهما كانت كبيرة ومهما كانت فظيعة.. فهى محدودة، حاول تستثمرها على قد ما تقدر ومتحلمش بإنك تشيل أكتر من اللى تقدر تشيله عشان ده هيأثر على جودة شغلك.
10- وقتك 24 ساعة فقط، اتصرف!
11- اسمع أى نصيحة تتقدملك، اسمعها كويس، خد منها اللى انت عاوزه واعمل برضه اللى فى دماغك.
12- مفيش حاجه ليها آخر.. بس كل الحاجات بتبتدى بأول.
13- اكتب قايمة بكل الوعود عشان متنساش أى حاجة مهما كانت بسيطة، واوفى بوعدك مهما كان فى نظرك متأخر.
14- كل يوم ربع ساعة قبل ما تمشى من مكتبك.. رتب إيميلاتك فى labels and folders.. ال700 إيميل اللى مش مترتبين فى أسبوع هيبقوا كل واحد فى مكانه، ومتخافش من التصنيفات الكتير، وال160 إيميل اللى متردش عليهم هتحس إن الرد عليهم شيء بسيط.
15- المهمة (التاسك) التقيلة على قلبك قسمها لمهام صغيرة.
16- لما تاخد بريك متعملش حاجة تعكنن على اللى جابوك وتبوظ يومك زى أنك تشوف ال«فيس بوك» أو تكلم حد عارف أنه هينكد عليك.
17- اعرف إيه الحاجات اللى بتعملها اللى بتخليك ترتاح وتفك دماغك من كل حاجة.. تسافر، تاكل أكلة معينة، تخرج مع ناس معينة، تتفرج على فيلم أو التليفزيون أو تنام أو تنعزل؟ أو تروح مكان معين أو تقرأ نوعية كتب معينة؟
المهم إن يبقى عندك كذا حاجة من دول تقدر تعملها فى أوقات متباينة وعلى حسب ظروفك.. مهم قوى علشان تعرف تواصل إنك تفصل.
18- صلح علاقتك مع ربنا، هتحس بطاقة عظيمة، وبركة فى الوقت.
19- ما تحتفلش بانجازك قبل أوان الاحتفال.
20 - تخلص من عادة «الحركرك» وعادة إنك تأجل كل حاجة لآخر لحظة.. أوقات كتير مش حتلحق خصوصا لو جالك عفريت الديدلاين فى اكتر من مشروع فى نفس الوقت.