الله أكبر.. بسم الله.. مبروك يا مصر

من خطوة لخطوة ياريسنا ومن نصر لنصر وبإذن الله تعالى وتعلى وتعيشى يا مصر.
الله اكبر بسم الله بسم الله أدِّن وكبَّر بسم الله بسم الله.. يا قناة سويسنا بسم الله بسم الله أدينا عدينا بسم الله بسم الله..ما قِدروا علينا بسم الله بسم الله جنود أعادينا بسم الله بسم الله.
بسم الله مجراها ومرساها.. نفتتح قناة السويس الجديدة شريان الحياة شريان مصر.
مبروك يا مصر مبروك ياغالية يوم فرحتك يوم انتصارك يوم زفافك
العالم كله ياعروسة يامحروسة بينظر لك.. الزينة والزغاريد والأعلام فى كل شبر من أرضك وشعبك ملا الشوارع من الفرحة وولادك طايرين بيلمسوا السما بإيدهم وحتى اللى بعيد عنك ومتغرَّب فى بلاد غريبة قلبه بيرقص خرج فى كل بلدان العالم رافع اسم مصر وعلم مصر وبيهتف تحيا مصر تحيا مصر.
مبروك ياحبيبتى من حقك تفرحى صبرتى كتير وحزنتى، وبكيتى كتيروفقدتى ولادك كتير..اتغدر واتمكر بيكى كتير واتسرقتى واتنهبتى وشفتى الخيانة بعنيكى.. لكن ربنا عوض عليكى رجل حر وطنى شريف بيحبك وبيعشق ترابك شال روحه على كفّه وقال بكل شجاعة فى وجه الخونة الظالمين الطاغين: لا لا إلا مصر إلا أرض مصر إلا شعب مصر، وكان القرار مصر
خرج لنا وصارحنا بكل شيء وكان يعلم إن إرادتنا هى الخلاص، وإننا رافضين للخونة الجواسيس كارهين لمن قتل ولادنا وتفاوض على أرضنا وعِرْضِنا، وأننا بنطالب أن يرحلوا عنَّا وعن حكمنا ولأن دايما الجيش مع الشعب وهو ضهره وسنده، ولن يأخذ أى خطوة إلا لصالح الشعب قرر القائد البطل أنه يجمع ولادك إيد واحدة روح واحدة (شعب وجيش وشرطة).
قال عايز تفويض قلنا معاك..قال انزلوا عشان مصر قلنا وراك..قال تتقطع إيدينا لو اتمدت عليكم يا مصريين قلنا فى حِمَاك وصدق فى كل حرف قاله وصدق فى الفعل قبل الكلام وعد ووفى..وعاش اللى قال الكلمة بحكمة وفى الوقت المناسب..عاش اللى قال يا مصرنا مفيش محال..عاش ليكى ابنك عاش اللى حبك رد اعتبارك خلَّى نهارك أحلى نهار..اللى حامى الأرض يسلم، اللى صان العرض يسلم، تسلم ياريسنا تسلم.
قالوا القناة تتحفر فى 3 سنوات قلت بابتسامة ونظرة تحدى سنة واحدة.
وعدت ووفيت شعب مصر بيقولك شكرا على كل شيء بدءا من وقوفك بجانبنا وحمايتنا من أهل الشر حتى لحظة احتفال مصر بالقناة الجديدة
افرح ياريس رفعت رأس بلدك وشعبك.
ملوك ورؤساء ووفود العالم حضروا لزفاف المحبوبة وكل نظراتهم انبهار وإعجاب بأعظم إنجاز.
ربنا يحميك ويحفظك ويبارك فيك ويقويك على الحمل الكبير.
شكرا أنك فرحت قلوبنا..شكرا أنك عملت لينا كرامة فى العالم كله..شكرا أنك كنت إيد تحنو علينا..شكرا على إخلاصك..شكرا أنك جمَّعتنا ورجعتلنا مصر..شكرا يا ريسنا..والله وعملوها الرجالة ورفعوا راس مصر بلدنا ووقفوا وقفة رجالة الله عليكم يا ولادنا..مبروك يامصر مبروك يا أحلى عروسة..مبروك ياغالية يا معشوقة ياروح الروح (يا اللى عاش حبك يعلِّم كل جيل من بعد جيل يا اللى علمتينا دايما نلغى كلمة مستحيل).
مبروك عليكم يا مصريين النصر الجديد حلمُكم اتحقق وكتبتم اسم مصر واسمكم فى التاريخ (أنتم أحلى وأطيب وأجدع شعب) قراركم وإرادتكم وإصراركم سر نجاحكم، قراركم يا مصريين أن تستردوا أرضكم وعِرْضكم وتصنعوا حاضركم ومستقبلكم وكان لكم كل ما أردتم.
أنتم شعب جبار وقت القرار.
افرحوا بانتصاركم..افرحوا بقناتكم الجديدة..افرح يا شعب مهما حصل مش هيكسروك أو يحطموا إرادتك القوية وعزيمتك..افرح وارقص وغنِّى لأغلى اسم فى الوجود..ارفع راسك فوق..أنت مصري..والله أكبر بسم الله
مبروك يامصر.