حاجات مفيدة تعملها في المواصلات

بما إن السكك بقت زحمة جدًا.. ووقت كبير بيروح في المواصلات لو قلنا ساعتين يوميًا بسبب نزول الكلية أو الشغل إلخ.. هيضيع في الأسبوع 14 ساعة يعنى على مدى سنة هيضيع منك 30 يوم بس في المواصلات.. طبعًا ساعتين دى أقل تقدير يعنى..
نصيحتى قبل ما اقولك ازاى تستفيد بوقتك إن أحسن مكان تقعد فيه بيبقى ف الشمال... بعيدًا عن اللى نازل واللى طالع والأجرة اللى بتتبعت وكل ده..
1- هتاخد معاك في شنطتك كتابين على الأقل.. وأول ما تركب وتدفع.. متشيلش عينك من الكتاب اللى هتبدأ بيه..
عاوز أقولك إنى خلصت مُعجِز أحمد للمعرّى اللى هو بيشرح شعر المتنبى وده كتاب كبير مجلدات كاملًا كله في المواصلات بس.. بالهوامش والتعليقات وكل حاجة قلبك يحبها.. الكتاب التانى ده عشان لو ملِّيت من الأولانى.. بس أرجوك حاول من الأول تبين اسم الكتاب للى جنبك عشان فضوله هيقتله كل شوية يعرف بتقرا إيه وعشان تنشر ثقافة إن الناس تقرا في المواصلات لما حد يشوفك ممكن يعمل زيك بعد كده.
2- سمّاعاتك معاك دا شىء أساسى.. ممكن تسمع شوية قرآن صدقنى هتحس بتحسن كبير.. أو أغانى أو ابتهالات أي حاجة تحبها هتلاقيها على الساوند كلاود ومتخافش مبياخدش من باقة النت كتير.
3- ممكن تسمع شعر عربى بيتنطق صح للناس اللى بتحب الفصحى ونفسها تطّور فيها.. القناة دى على اليوتيوب عليها حاجات ياما حلوة: http://tiny.cc/hur6ux
4 - ممكن تدخل على النت تقرا مقالات متنوعة في السياسة والثقافة من خلال مواقع بتقدم معلومات شيقة زى ساسة بوست واراجيك.
5- ممكن تحفظ قرآن، أو تراجع لو بتراجع.. أو تقرأ.. ممكن تحفظ نص صفحة على الأقل في السكة.. يعنى في الأسبوع قول ربع ونص أو ربعين.. يعنى ممكن تختم في سنتين ونص!
6- ممكن لو لقيت طفل صغير- أو طفلة- راكب جنبك تقعد تلعب معاه.. السعادة طفولة قلب.. نقى روحك بالتعامل مع البراءة يعنى smile emoticon
7 - إوعى بأى شكل من الأشكال تتجن في عقلك وتخش في نقاش سياسي مع الناس. مفيش أمل.. وإوعى تسمعهم برضه لإن غالبًا هيجيلك شلل نصفى..
8 -ممكن لو عاوز ترفه عن نفسك وموبايلك أو تابك ممكن يشغل فيلم مثلًا أو حاجة فيديو وتشوفها كويس.. ممكن دى شوية Series كده هيعجبوك:
9- لو تعبان وعاوز تنام ومش عارف هتعمل التمرين ده.. هتاخد نفس عميق ثانية.. وبعدين تطلعه من بوقك ثانيتين.. يعنى لو حسبنا الثانية عَدّة واحدة.. يبقى هتدخل الهوا كله في عَدَّة واحدة وتطلعه في عدّتين.. وهكذا.. وركز في نفسك وهو داخل ووهو طالع وراقبه وبس، متركزش ف حاجة غير دخول نفسك وطلوعه وممكن تفوت الحتة اللى هتنزل فيها..
10 - مرة كنت بانزل مخصوص من غير ساعة معايا عشان أنمى قوة الملاحظة.. هتقولى ازاى..
هقولك وانا في المواصلات أقعد أبص في المحال في الساعات اللى جواها والعربية ماشية بسرعة.. وألقط الساعة كام.. أو حد ماشى ف الشارع لابس ساعة.. أو أيًا كان.. وده كله نمّى عندى قوة الملاحظة.. هي حاجة ممكن تحسها غريبة بس نتايجها حلوة.
من النسخة الورقية