نصائح لوجه الله.. هدايا أحسنلك ماتجيبهاش لأمك فى عيد الأم!

عيد «ست الحبايب» بيقرب، وكلنا نستعد علشان نشترى هدية مناسبة ليها وتجيد استخدامها وتكون في حاجة لها، لكن... في هدايا ابعد عنها، واوعى تقكر تجيبها مثلا:
سماعة «بلوتوث»
عشان أمهاتنا بالكاد تعرف تشغل الموبايل تتكلم بيه... تلعب بيه «snake»، أكتر من كده ماتعرفش، وبكده انت بتقولها بطريقة غير مباشرة إنها تجهل بالتكنولوجيا.
مقشة
ابعد عن مستلزمات البيت، هات لها حاجة تحسسها بالخصوصية.
حاول لما تجبلها هدية تكون ليها هي وبس مش للبيت بقى والكلام القديم ده.
طقم فناجين وأطباق
فكرت في لحظة إن دى حاجة لو استخدمتها أساسا هتبقى مش ليها ولا ليك... دى هتبقى للضيوف!!
شبشب بيت
أصل الشبشب فيه مشكلتين، واحدة منهم بتقولها من تحت لتحت إنك يا ماما حافية وأنا خيرى عليكى كتير وبكسيكى، والمشكلة التانية أن الشبشب ده هيجى يوم وانت هتتحدف بيه.
دبدوب
عشان هتقولك أنا أعمل إيه بالبتاع المقلبظ ده هو أنا صاحبتك عشان تجبلى دبدوب أحمر.. هي كبرت على موضوع الدباديب ده من ييجى 20 سنة كده.. بدل الدبدوب بورد.
شرايط إليسا
لو عايز تغامر وتجيب لها ألبومات إليسا انت حر بس حياتك كلها هتتقلب نكد، إليسا قادرة إنها تحول إن تدمر أي حاجة إيجابية ف حياة أمك، وبالتالى في حياتك.
مزيل عرق وشاور جيل
هي مش هتقول حاجة.. هي هتفهم لوحدها انت عايز تقول ووشها هيعبر عن اللى جواها، والليلة هتقلب نكد، فابعد عن الهدايا دى عشان ماتتفهمش غلط.
بلوزة مزركشة
من الآخر كده ابعد عن موضوع اللبس ده عشان مش هتعرف تجيب لها حاجة، هتجيب لها حاجة شبابى هتقولك أنا عجزت، هتجيب لها حاجة وقورة هتقولك هو انا عجزت يعنى! وف الحالتين هترجعك بيها وتاخد الفلوس في إيديها.
طقم سكاكين
ابقى استجرى زعلها بقى بعد الهدية دى انت اللى جبته لنفسك.
من النسخة الورقية