الصابون كتير بس النٍفس إللي تغسل

البلد مليانه صابون ، بريحة وبدون ، سايل ومتجمد .. سايب وفرط وف أزايز جاهز ومتعبي ، بس النفس اللي تشتري وتغسل .. الحال المايل ده ما يختلفش كتير عن مبادرات الصلح والمصالحة بين الدولة والجماعة .. طن مبادرات متعبية في كراتين .. وطنين تلاتة من نفس المبادرات دي متشونين على الأرفف .. والنتيجة ؟؟ ولا حاجة خالصة .. مفيش نفس بتاتا لمجرد فتح كلام مع جماعة حرق الدم .. عبد المنعم أبوالفتوح الإخواني المستخبي في جلابية السياسة ، نصيبه من المبادرات خمس ست سبع عشر مبادرات أخرهم مبادرة أول امبارح ، طرحها وشدد وحذر من استمرار العنف الإخواني .. أبو الفتوح يحاول أن يظهر بمظهر " الحُنين " قلبه علي البلد .. ومن إمتى يا دكتور ؟؟ .. من غير حِلفان .. راضين زمتك .. يعني إيه مبادرة صلح ..؟ ومع مين .. ؟ وليه .. ؟ .. وبعد إيه ؟ .. بعد خراب مالطة .. بعد كم الدم ده وكم الضحايا دول .. واضح إن التنويم المغناطيس طالك يا دكتور .. إصحى فوق .. وأعد قراية اللى فات من دم وقتل وتفجيرات واعد على نفسك هذا السؤال: "دي جماعة تستاهل حد يسامحها تاني ؟ دكتور.. التطبيع مع العدوين "الإخوان وإسرائيل" .. مرفوووووووووووووووض .