تقارير : ضباط شرطة يردون على اتهامات حازم صلاح أبو إسماعيل لوزير الداخلية بالتواطؤ والخيانة.. ويؤكدون : كلامك لا يعنينا لأنك كنت نائم فى بيتك عندما قدمت الشرطة 165 شهيدا و7000 مصاب

اشتعلت حرب التصريحات بين الشيخ حازم صلاح أبو إسماعيل المرشح المستبعد من انتخابات رئاسة الجمهورية وعدد من ضباط الشرطة على موقع التواصل الاجتماعى "فيس بوك"، حيث نشرت صفحة "آسفين يا شفيق" فيديو خاص بالشيخ حازم وهو يتهم اللواء أحمد جمال الدين وزير الداخلية بالخيانة والتواطؤ، وذلك أثناء أزمة توقيف رجال الشرطة لأعضاء من حركة حازمون، عقب اقتحام حزب الوفد، وقال خلال الفيديو: "أنا قولت لأحمد جمال الدين وزير الداخلية أنت متواطئ و خائن هو و اللى معاه.. وأن جهاز الشرطة فى حاجة للتطهير، شرطة عايزة تتكنس ومتربوش كفاية.. أنتوا حثالة ".
وأضاف "أبو إسماعيل" فى الفيديو، أن جهاز الشرطة ترك الشيخ المحلاوى البالغ من العمر 90 سنة محاصر داخل مسجد القائد إبراهيم بالإسكندرية 24 ساعة قائلا: "سايبين الشيخ المحلاوى 24 ساعة تحت التهديد وعنده 90 سنة "، واستكمل " هزلت والله لأربيهم"، مشيرا إلى أنه يستطيع أن يحضر مصر كلها إلى أمام مكتب وزير الداخلية.
ورد عدد من رجال الشرطة ومناصريهم على من خلال صفحة "كلنا بنحب مصر " على موقع التواصل الاجتماعى "فيس بوك" قائلين: "عفوا يأبو إسماعيل أنت وأنصارك.. فاض الكيل ولازم نتكلم مادام أنت اللى بدأت يا حازم، أنت قلت الشرطة عايزة تتكنس وقلت أنك هتربينا.. الكلام اللى قلته ده لا يعنينا ولا هنلتفت ليه لأنه ميسواش عندنا تعريفة، ولما تتكلم عن وزير داخلية مصر أو ضابط أو فرد أو مجند أو عن وزارة قدمت للبلد 165 شهيدا كانوا بيموتوا فى الشوارع وأنت نائم فى البيت وقدمت أكتر من 7000 مصاب، بيواجهوا القرف والمعاناة اللى مالناش ذنب فيها يبقى تتكلم كويس وبأسلوب أحسن من أسلوبك."
وأضافوا: "ولو فاكر أننا هنخاف نرد عليك أو نواجهك تبقى غلطان عشان أنت بتكلم ناس مصاحبه الموت ودفنت زملائها بأيديها ولو متعرفش ممكن أعرفك، كلامى لسه ما خلصش عشان عارف أنه مش هيعجب المشجعين بتوعك، بس أنا هدافع عن مهنتى ووزارتى وزمايلى ووزيرى اللى أنت أهنتهم والأيام بينا وهات اللى عندك ولو عايز تجرب افتكر قسم الدقى..خلص الكلام يا حازم".