"أول مرة تحرير".. نصائح النشطاء للمستجدين

رحاب فوزي
أطلق نشطاء عبر مواقع التواصل الاجتماعي نصائح للمستجدين في الميدان او من سيشاركون للمرة الاولى وأطلقوا عليها أول مرة تحرير , حيث قدموا فيها نصائحهم وخبرتهم بالثورة والميدان.
وهذه النصائح تتلخص في هذه النقاط:
- اوعى تنفصل عن مجموعتك مهما كان السبب واشحن موبايلك على آخره وياريت لو معاك بطارية تانية مشحونة
- ما تشيلش غير علم مصر ..لا أعلام أحزاب ولا حركات
- لا تستفز العساكر ولا تهينهم أو تعتدي عليهم بالضرب أو الأذى هم أكثر ناس غلابة في هذه المأساة وهم أيضا لهم أسر تنتظر عودتهم
- اوعى تتكسف تهتف ، لازم تهتف.. أنت بتهتف من أجل الوطن مش من أجل حد
- هاتلاقي ناس بتحاول تستفزك لو أول مرة إنت فلول إنت صوتت لمين .. اعمل نفسك مش سامع و كمل سيبك منهم
- ماتدخلش الميدان بإيدك فاضية....خد حاجة واحدة معاك للمستشفى الميداني وسلمها بنفسك
- إذا وقعت وتعرضت للضرب، تكور في وضع الجنين واحمي رأسك بذراعيك وبطنك بساقيك. الرأس والبطن فيها نقاط الضعف- احميها.
- كل بنت في الميدان أختكم واللي يحاول يتحرش بيها حتى بكلمة خاين خيانة عظمي للثورة.. خلوا المتحرش هو إللي مرعوب من وجوده وسطكم
- ممنوع الميكاب والعدسات اللاصقة والكريمات (يتجمع الغاز تحتها) وأي ملابس حد يقدر يشدك منها بالذات من الخلف.
- أغلب الناس في التحرير في الشارع بقالهم سنتين وضد الديكتاتورية، إنزل انت كمان ضد الديكتاتورية وبس.
- الناس في التحرير كانوا على طول مبتسمين,خلي الإبتسامة متفارقش وشك مهما حصل
- أعرف أن الميدان مش حكر على حد , وأنك مواطن مصرى نازل تعبر عن مطالبك سواء أول مره او المليون.
- ما تعتمدش على الاتصال سواء بالموبايل او النت لان الشبكة مع تجمهر الناس بتضيع، الافضل انه يكون فيه نقط للالتقاء متفق عليها
- من أدبيات المظاهرات لما تسمع هتاف سلمية تعرف ان المتظاهرين بيتضربوا ولما تسمع هتاف ايد واحده تعرف ان في مندسين
- هتشوف مصر اللى نفسك تعيش فيها و مفيش فرق بين مسيحى و مسلم
- متسألش مين مع مين كلنا مع مصر
- ماتزعلش انت جيت فى الوقت المناسب
- عيش التجربة الثورية
- هتلاقى واحد أول مرة تشوفه فى حياتك هيخاف عليك أكتر من نفسك
- بالنسبه للبنات حاولى تكونى فى مجموعات ومتسيبوش بعض لاى سبب والبسى بنطلون لسهوله الحركة حتى لو تحت العبايه او الجيبه
- لو حد سألك ان تبع مين ؟؟ قوله انا تبع مصر ونازل ليه؟؟ نازل علشان مصر”
- انت نازل لمصر مهما كان صوتك اللى فات لمين انت نازل لمصر يعنى مفيش حاجة اسمها فلول مفيش حاجة اسمها نخبه مفيش حاجة اسمها حزب.