بعد إصابته بشلل في المعدة.. إدوارد أحدث ضحايا حقن التخسيس

كشف الفنان إدوراد عن تفاصيل تعرضه لشلل مؤقت في المعدة بسبب حقن التخسيس مشيرا إلى معاناته مع هذه التجربة التي أوقعته ضمن قائمة النجوم ضحايا حقن التخسيس.
وأوضح إدوارد تفاصيل تجربته عبر صفحته الشخصية على فيسبوك قائلا :«كلام مهم جدا أنا كنت باخد حقن التخسيس ونزلت حوالي 15 كيلو.. بس مشكلتها بتتاخد كل يوم في المعدة لكن ميزتها أننا نقدر نتحكم في الجرعات عشان منتعبش ووصلت الوزن اللي أنا عاوزه ودخلنا في مرحلة التثبيت».
وتابع إدوراد قائلا :«الدكتورة طلبت مني أروح لدكتور جهاز هضمي أعمل تحاليل ونطمن بس أنا طنشت وقولتلها أنا هاخد حقن أسبوعية بدل اليومية عشان تعبت من كل يوم حقنة وفي ناس نصحوني بنوع حقن آخر أسبوعية ومش قوية زي الأولى» مضيفا :«كنت باخد كل أسبوع حقنة وكانت تمام معايا وكانت برده الدكتورة بتسألني على التحاليل كل فترة وكنت بطنش لأني تمام مش حاسس بحاجة».
وأضاف:«وكمان لا كنت بتخن ولا بخس وباكل عادي طبعا بس بردو مواظب على دايت مع الدكتورة لحد الأسبوع اللي فات فجأة مش جعان خالص وقعدت حوالي 4 أيام مش بدخل حمام ولا قادر أكل ووجع في معدتي جامد.. الدكتورة قالتلي وقف الحقن وروح لدكتور جهاز هضمي فورا وعملت كده ».
واستكمل قائلا :«روحت لدكتور قالي حصلي شلل مؤقت من الحقن في المعدة وكان مفروض تتابع معايا مع دكتورة التغذية قولتله أنا اللي كنت بطنش عشان كنت تمام.. قالي الحقن مش وحشة ومفعولها كويس بس أنا بنصح أقصاها 3 شهور بس تاخدها وتوقف فترة وترجع تاني.. من غير ما أطول عليكم أنا بقالي أسبوع بتعالج وعملت كل التحاليل حتى صبغة على الكلى».
إقرأ ايضا: قبل العرض الخاص ل «الهنا اللي أنا فيه».. أعمال جمعت «دينا وياسمين»
واختتم إدوارد حديثه قائلا:«الحمد الله معنديش غير شوية زيادة في الأملاح زي كل المصريين، بطني بتتحسن واحدة واحدة ولسة المعدة وجعاني» موضحا سبب نقله لتجربته مع حقن التخسيس قائلا :«أنا حكيت لكم تجربتي عشان بقولكوا إن الحقن مش وحشة وجابت نتيجة معايا بس لازم مع دكتور التغذية دكتور جهاز هضمي وكمان دكتور قلب لو أمكن عشان سرعة ضربات القلب».
وأنهى حديثه قائلا:« أتمنى أكون قدمت لكم معلومات كويسة عن تجربتي وربنا يشفي أي حد تعبان وأشوفكم دايما كويسين».
ضحايا سابقين
ولم يكن إدوارد هو أول ضحايا حقن التخسيس ولكن سبقه عدد من النجوم الذين كشفوا عن معاناته مع هذه الحقن أخرهم الفنانة هند عبد الحليم ومنى فاروق االذين أعلنوا إصابتهم بشلل مؤقت في المعدة بسبب حقن التخسيس.