علي ياسر: «اتفاجئت إن الزمالك استغنى عني»

أكد علي ياسر لاعب الزمالك السابق أنه تفاجئ باستغناء النادي الأبيض عنه بعدم قيده في قائمة الفريق للموسم الجديد.
وقال علي ياسر عبر صفحته على موقع التواصل الاجتماعي فيسبوك: «وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا) بعد إغلاق القيد حابب أقول حاجة بس بعد ما قطعت إعارتي مع نادي مودرن سبورت (فيوتشر) لحد النهاردة الصبح كنت مفكر اني متقيد في نادي الزمالك زي ما اتقال ليا بعد محاولات كثيرة من التواصل مع مسؤولين النادي قبل إغلاق القيد لا حد سأل فيا ولا اتواصل معايا عشان أعمل أبسط حقوقي إني أنزل اتمرن حتى».
أضاف: «بعد ما رحت النادي اسأل على موقفي وإني محتاج أعرف هعمل إيه لأني قاعد ف البيت بقالي شهرين و هقعد ف البيت لحد شهر يناير اتفاجئت إن النادي استغنى عني قبل ما القيد يقفل بدون علمي لا حد كلف نفسه ثانية يكلمني يقولي على حاجة ولا حد كلف نفسه ثانية يرد عليا عشان أعرف موقفي بعد ما اتقال ليا قبل كده من مدير الكورة إني متقيد في النادي لحد دلوقتي أنا قاعد في البيت بسبب تعاملي باحترام واحتراف زي ما اتربيت و اتعلمت من وأنا صغير بس في الكورة ساعات بيجوا على المحترم والمتربي شوية».
تابع: «دايما هيفضل عندي قناعة إن في الكورة زي ما في الحلو في الوحش وده جزء كبير من الكورة فبكل الظروف هنعدي بيه و نستحمله عشان دي الحاجة اللي الواحد بيعرف يعملها و بيحبها، والله يعلم اني محب ومشجع لنادي الزمالك منذ الصغر و اني كنت أتمنى اتوج مع نادي الزمالك ب كل شئ لأن ده حلمي منذ الصغر لكن بعض الناس كان لها رأي آخر».
أتم: «لكن حابب أشكر الجمهور واللاعيبة والمدربين اللي وقفوا معايا وسندوني في أول ظهور ليا مع نادي الزمالك وفي ضهري من وأنا صغير داخل جدران نادي الزمالك ودايما كانوا اخواتي الكبار ودايما كنت بتعلم منهم ونسأل الله التوفيق فما هو قادم ليا و لنادي الزمالك وشكرًا».