خالد عليش: يروي معاناته لرؤية ابنته «لجأت لطرق قانونية»

كشف الإعلامي خالد عليش، عن إلزام طليقته بدفع 50 ألف جنيه تعويضًا لامتناعها عن تنفيذ حكم رؤية ابنته الصغيرة بعد طلاقهما.
وأضاف عليش، عبر حسابه بموقع فيسبوك، أنه محروم من ابنته عل الرغم من التزامه بالاتفاق ودفع المبالغ المادية المستحقة عليه.
وكتب خالد عليش : من شهر مايو اللي فات وأنا كسبان قضية إني أشوف بنتي 11 ساعة في الأسبوع وبالتالي أقدر أخدها وأخرجها زي ما كان الاتفاق اللي تم وقت الانفصال واللي على أساسه بدفع المبالغ المالية المطلوبة مني، وبالمناسبة أنا كنت بشوفها فعلا أول كام شهر بعد الانفصال زي الاتفاق ولكن فجأة بدأت حجج كتير لمنعي ومنع أهلي واضطريت أطلب حقي بالقانون مغ إني مش غاوي بهدلة.
وواصل خالد عليش: من وقت الحكم في شهر مايو اللي فات وبعت بطرق غير رسمية ورسمية إني أطلب أنسق عشان آجي أخدها وأفسحها وأرجعها ومفيش فايدة، ولجأت لطرق قانونية تثبت عدم رؤيتي والنهاردة خدت حكم جديد بتغريمها مبلغ مالي لعدم تنفيذها الحكم، حكم كل معناه إني أب بيدفع اللي عليه واللي متفق عليه ومحروم من بنته برضه.
وأضاف خالد عليش: ولحد دلوقتي مستغرب جدا أن في حد موافق أن أم تمنع أب عن رؤية طفلة وتكون بتتشرط عليه وتمسكه من ايده اللي بتوجعه ويتسقفلها كمان، ومتعجب جدا أن في أم بترفع استئناف وتقاتل عشان تمنع حكم بيقول أن بنتها تستمتع ب باباها ويخرجها ويفسحها ومصممة أنه ينفذ رؤية قانونية فقط ويقعد معاها ساعتين زي المسجون في مكان مقفول.
واختتم خالد عليش، حديثه قائلا: آخر حاجتين كنت أتمناهم في حياتي أن أنا وأم بنتي نقف في المحاكم قدام بعض وإن بنتي تعيش أحلى أيام طفولتها محرومة من فسح وحنان أبوها، ولسه عندي استعداد للحلول الودية بدون ابتزاز أو استغلال.