- اعمل حسابك بقى هتودينى حفلة الست روبى، الساحل الشمالى نادانى ياسى السيد! - استهدى بالله يا أمينة.. انتى عارفة تذكرة دخول حفلة روبى بكام؟ - مليش دعوة وكفاية أنك ضحكت عليا وفضلت الشهر اللى فات تقولى بكره بعده لغاية ما ضيعت منى حفلة سى عمرو أديب! - دياب مش أديب يا ولية انتى لسه متعرفيش الفرق؟! - ان جيت للحق ياخويا مفيش فرق أهم كلهم بيغنوا! - يا ولية تذكرة الحفلة من دول أكتر من خمسين ألف؟! - يا رب حتى تاخد الغويشتين اللى لسه فاضلين تبيعهم! - هو أنا مش لسه سائلك من يومين لو لسه فاضل معاكى غوايش علشان ندفع فواتير الكهربا والمية والغاز المكسورة علينا قولتيلى إنه معدش حيلتك حاجة؟انتى بتخبى عليا؟ - كنت شايلاهم لوقت عوزة وأدى وقتهم جه أهو! - عوزة إيه دى اللى تخلينا نبيع دهب علشان حفلة روبى ومنبيعهوش عشان نسد حنك الحكومة؟ - مرة من نفسى وبعدين الحكومة ممكن تصبر لكن حفلة روبى مش حتستنانا وكمان فواتير الحكومة بتجيلنا كل شهر لكن حفلة روبى مش بتيجى غير مرة فى السنة! - مش عايز أحرجك وأقولك إنك مش قد شروط الإتيكيت اللى مفروض تكون عند الناس اللى بتحضر الحفلات دى! - تيكيتيت إيه وتنكيت إيه ياخويا هو أنت فاكرنى الست أمينة حرباية بتاعة التيكتيت دى اللى بتيجى فى التلافزيون تعلمنا ناكل ازاى العنب ولا نقطع البطيخ ازاى! - ههههههه الله يحظك يا أمينة شلناية ايه هى بطيخة، اسمها شلباية.. عموما اسمعى: ماينفعش حد يحضر الحفلة لوحده يعنى لازم ياخد معاه كابل! - كابل ازاى يعنى وايه دخل السلك والكهربا بحفلة زى دى - هههههههه كابل يا ولية يعنى ثنائيات بالإنجليزى يعنى كل الأحبة اتنين اتنين. - اه قول كده بقى يا سى السيد شكلك عايز تنطرنى من الليلة دى وتروح أنت تحضر مع زبيدة ولا مع جليلة العوالم بتوعك، لا ماهو أنا مابقاش بايعة دهبى وكمان أتقنطر! - يا حاجة افهمى ومتفهمنيش غلط لأن لو أنا أخدتك معايا فهدومك اللى بتلبسيها دى مش حينفع تحضرى بيها الحفلة..الناس ممكن تسيب روبى وتتفرج علينا احنا وبالذات لو شافوا طرحتك دى! - يا خبر يا سى السيد هى الست روبى عايزانى أقلع التحجيبة ياخويا؟ - لا هى مقالتش كده يا أمينة بس قالت ممكن تلبسى بدالها التربون ! - ويطلع إيه التربون ده يا سى السيد؟ - تقدرى تقولى حاجة كده زى الزعبوط يا أمينة - وماله زعبوط زعبوط بس أشوف الست روبى - فيه مشكلة كمان مش مسموح باللون الأسود يعنى لازم تلبسى ألوان فرايحى وأنا عارف انتى بتعزى الأسود قد إيه! - بسيطة يا سى السيد ميجراش حاجة يعنى لو قلعت الأسود يوم علشان روبى! - يعنى ممكن تقلعى الأسود يوم علشان روبى وأنا بتحايل عليكى عمرى كله تلبسيلى حاجة غيره، طب الحمدلله أن الست روبى مشترطة محدش يلبس هوت شورت! - مليش دعوة أنا لو مرحتش حفلة روبى مش قاعدالك! - طب لمى هدومك السودا كلها وطلعى على أمك! - ماشى وايه رأيك كمان هاخد معايا الهوت شورت! - يعنى اشتريلك الهوت شورت من عشرين سنة متلبسيهوش فى البيت مرة ودلوقتى عايزة تروحى بيه عند أمك؟ليه ان شاء الله؟! - وهو انت غريب علشان البسلك ألوان وهوت شورت ؟!
