بسمة وهبة تشن هجوماً حاداً على عبدالله رشدي بعد انتقاده لبطل مستر أولمبيا| فيديو

شنت الإعلامية بسمة وهبة هجوماً حاداً على عبد الله رشدي، بعد انتقاده لبطل مستر أولمبيا بيج رامي، وافتاه بأن لعبة كمال الأجسام «حرام».
وقالت بسمة وهبة ، في برنامجها 90 دقيقة، المذاع عبر شاشة المحور، مساء اليوم الثلاثاء، إنه هناك إصرار من عبد الله رشدي وغيره من رؤساء العكننة أنهم يكملوا دور الإخوان ويستخدموا الدين من خلال فتاوى تحرم كل حاجة بدون شرح وبهدف ركوب الترند.
وأضافت الإعلامية بسمة وهبة ، أن:«عبد الله بقي متخصص في الفتاوى المثيرة للجدل وبيدور على الترند فين وبيجري عليه بسرعة وطبعاً شير ولايكات لبوستاته، والمدهش أنه بقي متخصص فن ورياضة والعكننة على المصريين وده بعد ما انتقد ممدوح السبيعي الشهير بالبيج رامي».
وتساءلت الإعلامية بسمة وهبة ، :"افتكرت الفتوى دي دلوقتي وأشمعنى دلوقتي وليه تعكنن على فرحة المصريين"؟!.
وتابعت أنه :" نفس الشيخ اللى طلع قلل من إنجاز لاعبات الإسكواش المصرى وتحديد نور الشربينى وبدل ما يتكلم عن انتصارها واسم مصر اللى رفعته قعد يتكلم عن اللبس ، وهو نفسه برضه اللى ساب كل حاجة في موضوع فريدة عثمان وركز مع المايوه.. وهو هو اللى ساب كل حاجة في الرياضة وانتصاراتها وركز مع اللبس الشرعى.. وهو هو اللى خد طريق عكس كل الناس وكتب يهاجم صلاح بسبب صورة الإعلان .. والحقيقة ده هوس غريب ومش مفهوم .. تحسوا إنه في إصرار من عبد الله رشدى وغيره من أعضاء قافلة العكننة على المصريين إنهم يكملوا دور الإخوان وشيوخ التطرف في استغلال الدين لتحريم كل شيء وتسويد كل شيء .. كده مرة واحدة بفتاوى مباشرة بتحرم كل حاجة بدون نقاش ولا شرح ولا إدراك للمتغيرات الاجتماعية والزمانية والتاريخية".
وأضافت :"الغريب في فتوى عبد الله رشدى بخصوص لعبة كمال الأجسام .. إنه أتكلم بس بعد فوز بيج رامى، يعنى ما هى اللعبة موجودة قدامك بقالها عشرات السنين .. اشمعنى تطلع الفتوى بتاعتك دى في عز فرحة المصريين بالإنجاز الكبير بتاع بيج رامى ..وده اللى خلى الناس ترد عليه على السوشيال ميديا وتقوله :" انت عايز تعمل شو وخلاص يا شيخ عبد الله؟ جاي تقول الكلام ده ومصر كلها بتحتفل ببطلها بطل العالم، ليه ما قلتش الكلام ده من زمان ولا انت أول مرة تعرف إن فيه لعبة اسمها كمال الأجسام؟".
فيما حرم عبد الله رشدي المشاركة في بطولات كمال الأجسام، بالتزامن مع فوز «بيج رامي» بمستر أولمبيا.
ونشر تغريدة على حسابه على "توتير"، كتبه فيها :" مارسْ من الرياضةِ ما شِئتَ دونَ أن تَخرِقَ ضوابطَ الشرعِ الشريف".