واحد من الميدان

أنا واحد من الميدان
أهلا بيكم... أهلا بيكم
أول حاجة هاقولها يارب
يصلح حال مصر وأحييكم
مش هاتكلم وأقول أنا مين
أنا واحد من بين ملايين.
شوفت هناك أشكال وألوان
اللي شهيد واللي مصاب
والي عاش عمره ورا الباب
جاي من بحري ومن الصعيد
كلمة واحدة حلم واحد
مش خايف ولا يوم هتاخد
بحلم زيك عيشة هنية
ورأسي فوق مش محنية
بقولها كفاية الكل معايا.
مصر بلدنا احلي حكاية.
قومنا بثورة.. ..ثورة لأء
مش طالبة أكتر من الحق
ضد الفاسد... ضد الظالم
كل نظام الفوضى الحاكم
كلنا واحد
هاتكلم وهاقول وهاقول
أنا مصري مش حزب فلول
كانت غمة وخلاص هاتزول
مش هاسيب الثورة تتسرق
ولا فتنة تخلينا نتحرق
أنا شارب من نهر النيل
مش هازهق لو ليلي طويل
أنا هاكتب وهاقول مواويل
من غير ياليل من غير ياعين
أنا محمد أنا جرجس
مش فارقة مين في الأتنين
مصريين..وطنيين..
مهمومين..فرحانين
من ثورتنا خافوا الملايين
أعداءنا اللي خربوا فلسطين
أنا واحد من الميدان
زي زيك حلمه الحرية
بكرافتة...بعمة ...وجلابية
من الزمالك ...من الشرابية
أنا مصري ولاهابقي ضعيف
أنا بأحلم الأقي ليا رغيف
رغيف نظيف خالي من السوس
هايتحقق مش هايبقي كابوس
أنا عايز حق المساكين
أنا بحلم وده حلم بسيط.
أنا فلاح بأزرع في الغيط
وهنزرع مصر الفدادين
ونصدر كده بالملايين
وهانغزل من توب مصر حرير
ونصنع أحلي البطاطين
والقطن هايتكلم مصري
مافيش مستورد أحنا نصدر
أحنا نقدر
أنا واحد من الميدان
أنا ياما نمت جعان
والمية باتت مقطوعة
مازهقتش ...وصحيت عطشان
أنا واحد بحلم بعروسة
وأنا جنبها قاعد في الكوشة
لحياة حلوة ومدروسة
وبشقة في مصر المحروسة
أنا واحد من الميدان
30سنة خلف القضبان
كله عليا كان غضبان
قومت وثورت وبأيدي شاورت
وللحرية أنا اخترت
أنا واحد من الميدان
أنا واحد شبعان من الخوف
بأتكلم مش بالمولوتوف
وطبيعي جدا في حياتي
في شغلي ..في بيتي..في صلاتي
أنا عادي جدأ. ومش هاسكت
لو فيها مماتي
أنا واحد من الميدان
أنا يوميا ليا سيجارة
مع الشلة وفي وسط الحارة
شوفت بلدنا في لحظة هاتولع
دوست سيجارتي
قومت جريت
قولت دي بلدي. والله خسارة
قسمنا الأصحاب بالاسم
وقولنا هانحرص شوارعنا
جرجس... جامع.. احمد...دير
جاسر وهشام علي القسم
قصدي دول يحرصوا في القسم
أنا واحد من الميدان
أنا يوماتي في التليفزيون
عادي...شهرتي عدت نابليون
واخد حقي من الهليبة
وجبت في ملعبهم 100جون
هيصولي .. باركولي
علي الكتف شالوني
شوفت بعيني جيت أتكلم
أنا والكرسي بره رموني
أطلع بره..أطلع بره
أنا واحد من الميدان
أنا واحد اخويا شهيد
اتغدر بيه في بورسعيد
شالوا من فوقه بوابة حديد
روحت أستلمه من المستشفي
سلمهولي في كيس أسود
شوفت الإهمال واصل فين
كان أول من70
روح شوف أمه بتعمل أيه
لابسة الأسود طول الليل بتنادي عليه
هوده ذنبه يشجع كورة. ولو مش ذنبه
الذنب لمين. ردوا علينا يا مسئولين
من الفرقة دايقين الويل
أنا واحد من الميدان
أنا جاي اعبر وأكشف ناس
ولافي ضمير ولا في إحساس
رتبتي عالية لكن مش هاقولها
قبل الثورة يجئ بكام يوم
بالتليفون صحوني من النوم
أحضر حالا بسرعة وفورا
ماأتخرتش ...حاضر طبعا
روحت لقيت القعدة أتنصبت
والخطة أترسمت وأتحسبت
قولت في أيه هاتعملوا أيه
نفذ فورا... خايف من ايه
وأحنا معاك ..هو بنفسه كمان وياك
دول عيال بسكوت فرافير
مهتمين بالفيس والشير
سيبهم في الملعب ساعة
بعد المغرب لو مش هايمشوا
هناك بنزين ..واهي الولاعة
لما رفضت وقولت انا لا
خللي ضميرك يجيبلك حق
وأول واحد كنت هناك
وصادوني من ورا شباك
ومن يومها وأنا قاعد عاجز
.بس ضميري دايما صاحي
دايما عايز وأقول لأ لا
أنا واحد من الميدان