شد وجذب

سنة حلوة يا مصريين

نحن مطالبون جميعا في العام الجديد ان نحافظ علي ما حققناه وان نشارك الجيش والشرطة في مواجهة الاٍرهاب الأسود الذي يحصد دماء اولادنا
إيه رأيكم نبدأ السنة الجديدة بنية خالصة إلي الله بالحب والتسامح وعدم التجريح وان يهتم كل منا بنفسه ولا ينظر إلي غيره.. تعالوا نتفق جميعا ان كل حاجه وحشه عملناها السنه (اللي فاتت) مانعملهاش تاني ياله نسامح بعض بجد ونشتغل بجد ونحمد ربنا اننا وصلنا لهذه المرحلة.. كل واحد فينا حاسس انه غلط في الاخر يطلب منه السماح..مشكلتنا اننا شعب طيب وعاطفي وكمان بنحب الكسل عمرنا ما (هنحقق اللي عاوزينه )الا لو اشتغلنا وطبقنا اللي بنقوله لغيرنا علي أنفسنا.. بقيت حاسس اننا بنطحن في بعض وكل واحد عاوز يطّلع علي جثث الجميع ومش عاوزين نصدق ان ما حدش هياخذ اكتر من اللي ربنا عاوز يكرمه به وبس..والله مش شطارة بشر ده رزق ومكتوب والرضا بركة الرزق.. اللي مقاطع أهله يروح يزورهم ويطلب السماح واللي مش راضي أمه يلحق يقدم لها كل فروض الطاعه.. بجد العمر بيجري بسرعة الصاروخ واحنا قاعدين كل يوم نتكلم..فلان قال وفلان عمل واللي قاعد يشوه في صورة صاحبه واللي بيتكلم علي الناس من غير اي سند ويدعي انه عالم ببواطن الأمور.. تعالو نفتكر فقدنا كام حبيب في عام 2014 وتعالو نفتكر هما خدو معاهم ايه.. ولا اي حاجه سابو الذكري الطبيه والعمل الصالح بس.. كلنا محتاجين نراجع أنفسنا وانا اولكم حتي لا يتخيل البعض أنني خارج هذه المنظومة..بس انا حاسس ان احنا ممكن نبقي أحسن من كده بكتير. انا فاكر ان من حوالي 3 سنوات كنت جالس في نفس المكان اللي بكتب فيه هذه المقاله ووقتها كنت بستعطف الشعب انه يحن علي الام مصر لان الأوضاع وقتها كانت تؤكد اننا رايحين علي سواد وكنا كلنا بندعّي ان ربنا ينقذ مصر من شر الخونة وربنا استجاب للدعاء ورزقنا برجل لا طامع في سلطة ولا فلوس والراجل ده عمال يلف العالم عشان يرجع مصر لمكانها.. مصر البيت الكبير اللي لو كان عمران هتبقي كل بيوتنا عمرانه وإذا كان خربان بيوتنا كلها هتخرب.. الراجل عمال يقول لازم كلنا نبقي علي قلب رجل واحد وكلنا نشتغل وبلاش فساد وبلاش سرقه انا شايف ان كلها مطالب مشروعة وهتعمل نقله للجميع.. لازم نعترف ان الحال الذي وصلنا اليه لم يكن وليد صدفه ولكنه نتاج الاهمال والفوضي واللا مباله والمصالح الشخصية..كل هذه الأمور أدت إلي انهيار الدولة وسمحت للاعداء ان ينقضوا عليها بعد ان أصبحت دولة ضعيفه لا تملك قوت يومها ونجح أهل الشر في جذب الفقراء واستغلوا حاجتهم للمال وحرضوهم علي تدمير الام ومازال البعض منهم يحرق ويقتل دون اي سبب أو سند.. نحن مطالبون جميعا في العام الجديد ان نحافظ علي ما حققناه وان نشارك الجيش والشرطة في مواجهة الاٍرهاب الأسود الذي يحصد دماء اولادنا كل يوم وان نثبت للعالم اننا شعب حضارة يستحق ان يكون في مقدمة الدول ولكن كل ذلك لم ولن يتحقق الا اذا خلصت النوايا.. أطالب الاعلام المصري ان يتقي الله فيما يكتب وفيما يقول واطالب الأغنياء ان يراعوا حقوق الفقراء واطالب كل رب أسرة ان يراقب تصرفات الأبناء حتي تعود القيم الحقيقية للاسرة المصرية التي أصبحت بلا معالم.. سننتصر بعون الله علي الاٍرهاب وستعود مصر قوية غنية شامخة اذا صدقت النوايا وعاد الضمير الغائب.. شكرًا للرجل المحترم الرئيس عبد الفتاح السيسي الذي استجاب لنداء الشعب وأنقذ مصر من أعداء الدين والوطن وشكرا لكل أم فقدت ابنها وهو يدافع عن تراب الوطن وشكرا لكل رجل دين حاول ان يمحو الصورة السيئه للإسلام بعد ان شوهه الخونة وجعلو العالم ينظر إلينا علي اننا همج وقتلة ومتخلفين..تحية صادقة إلي شهداء الجيش والشرطة وكل عام والمسلمين بخير بمناسبة المولد النبوي الشريف والاخوة المسيحيين بخير بمناسبة أعياد ميلاد السيد المسيح..وعاشت مصر قوية صامدة ضد أعداء الوطن.. وتحيا مصر.