دم الشهيد

ياللي أنت واقف في الميدان ديدبان ماتخافش من الوش الجبان خليك مرابط في المكان
الفجر لاح
والشمس طالعة من جبين
أنبل ولاد
مين اللي ضحي بالحياة
ومين اللي خان
ياللي أنت واقف في الميدان
فل وريحان
وردك بلون دم الشهيد
أحمر عنيد
فجرك جديد
قلبك حديد
ويساع كما كل الميدان
يا ابني. ياخويا
يابنتي. يا بويا
ياحبيبتي يانن العيون
كل اللي عشناه
قبل منكم كان جنون
كل اللي عشناه. كان سراب
وأتولدنا من جديد
من رحم ثورتكو الحنون
الموت واقف علي طرف الميدان مكسوف
والحياة دبة في أوصال اللي قالوا لا
واستشهدوا
الحياة طلة من عيونهم البريئة
من قلوبهم النبيلة
الحياة وهبوها للي عايشين من سنين
. ميتين
الحياة وهبوها لتراب الوطن
لجدران البيوت
لألوان العلم
للموت وللسكوت
دم الشهيد بكرة.
. حيجري في عروق النيل حياة
تطرح بساتين الأمل
والقمر يملك ضياه
يشتد عود الحلم
يوصل منتهاه
تخضر السنابل بالوعود
والخير يعود.
ويعود لنا. أمننا
ضحكتنا اللي تاهت مننا. دمنا
ملامحنا اللي شوهها السكوت
بلابلنا اللي هاجرت من سنين
ترجع تغنيلنا علي الناي.
اللي أصبح مش حزين
كل الكلام الحلو حيعود لنا
كل الليالي الدافية حتضمنا
دم الشهيد. خلاص. خلاص
قرر لنا
كتب الكتاب
رفع الجواب
فتح لنا السكة
وقدم مهرنا
ياحبيبتي يالا. أفرحي
وأتزوقي
وألبسي توب الزفاف
قلبي اللي كان خواف
خلاص أنتصر
علي السنين العجاف