أنا كلي مصرية

مش نص مصرية ده أنا كلي مصرية مش حبها في قلبي وكياني وعنيا. دي طفولتي وشبابي
وأجمل سنين العمر
قضيتها في بلادي
وغنيت مع ولادها
ليكي حبي وفؤادي
لو قلنا نحسبها باللقمة والتعليم
دي كتافي من خيرها
وهناك عرفت الدين
ده أنا عشت في ربوعها
أجمل ساعات وسنين
أول كلام قلته‏..‏ كان اللسان مصري
وأول قلم شلته
وكتبت فدائيين
علمني له مصري
وحضرت لما جمال سجلها قومية
وحفظت كلماته مترتبة قوية
وحلفت لما حلف بسماها وترابها
ماتغيب عن الدنيا
دي الشمس عربية
وحضرت أكتوبر
غنيت أغانيها
وحضرت كامب ديفيد
إزاي دي أنساها‏!‏
أنا عارفة ليه والدي ماقبلش فحواها
كتب أحلي أشعاره ومشي وخلاها
بس ماينفعشي‏..‏ ده عدوي جواها
وياريته لو عايش‏..‏ وحضر حكاويها
كان غني ويانا أحلي أغانيها
دي الغنوة عربية
غنوها مصريين
كلماتها اتكتب أيام صلاح الدين
يامصر ياغالية
الغنوة اتفهمت
كلماتها بتخوف حكامك الخاينين
باعوكي وافتكروا راح يخرجوا سالمين
ده ولادك الشجعان
خرجوا ومش راجعين
إلا أما يترعبوا
أعداءنا في فلسطين
يفتكروا أكتوبر‏!!‏
وباشوفها عالشاشة
الحلوة دي تكون مصر
الشعب في الميدان
حالف يجيب النصر
وياريتني كنت هناك
صليت معاه العصر
ما أنا كلي مصرية
وياريتني كنت هناك
علي أرضك الغالية
نتقاسم اللقمة ونجدد النية
ده انا شامة ريحانة
فايحة من الشهدا
طالة من الجنة علي أرضك الطاهرة
يامصر يافتية
ياغنوة عربية