مكسوف انا .. وخجلان من عملتى الشينة كيف القماش كشيت وصغرت _ انا _ ف عينى وعنين جميع الناس مش بس انا لوحدى لا كلنا صغرنا. وكشينا . . . . لاتبكى يا أمى دا انتى اللى والدانا وانتى اللى ساندانا وانتى اللى صدر حنون خد منا وادّانا وانتى إللى ربيتى وانتى اللى حبيتى وانتى اللى طول عمرك بتدادى وتسمى واحنا اللى - على حِسِّك - نورالنهار جابنا .. وودانا . . . . والله انا مكسوف طابا مشى كيف فى البلد. . وأمسك فى يدى عصا والبس عبايتى الصوف مش قادر ارفع عين لاف خالى ولا عمى سامحينى ياأمى مش قادر اشوف وشى وشى اللى عايزاداريه من كسفتى بكمى . . . هاتى اما ابوس يدك هاتى اما ابوس راسِك واعمل حرير خدى مشاية لمداسِك . . . . . يا أمى لا تبكى لا تبكى يا أمى دا انتى ان بكيتى. . الدمعة تِكوينى وان تزعلى منى يتخلى عنى الضيا.. ويتهد تَكوينى وانتى إذا غضبتى مين اللى يشفع لى لا دنيتى تعود لى ولا روحى ترجع لى ماانتى اللى خابرانى عارفة ان انا عارف إن انتى أم الكل مش للى مسلم بس ولا للى نصرانى الأم أم الناس هى اللى والدانا هى الدفا.. واحنا طول عمرنا مولودين وقلوبنا بردانة!!