أم كلثوم.. للمبدع فؤاد حداد

أنا والحبايب والأغاني وليف الطبع لاخضر والنبات والريف كانت حياتي وقفة مصرية
وسؤالي من عرق الفواعلية
إيه اللي يفضل من قلوب الناس
إيه اللي يفضل غير شقي الاحاسا
إيه اللي يفضل واللي يبقي لي
غير الجميل بيغني موالي
وجهلت مصر وسرها ما لم
أسمع لأجمل حس في العالم
أدي الضحي والليل سجي والحق
قلبك رفيق والشعب كله أرق
شوف العجب واللمة والراحة
والليل ضفاير بنت فلاحة
متجمعين وبالوعد متقاسمين
ريح الصبا وشلال من الياسمين
صوتك يا ست الكل غني لنا
فرحة شفانا وصبرنا ونيلنا
غني القمر واسقيني من لياليه
ومن السحور للفجر لما يليه
غني السواقي ردي أشواقي
أحيي الشراقي.. رقرقي الأنغام
غني الحياة قمحية الأحلام
تعلي البيوت وتشقر الأيام
غني الأمل قلبي انفرط حبه
نادي المنادي والشهود لبوا
غني اليتيم واكسي جناحه الريش
غني المتيم ينتصر ويعيش
غني الأصول خلي الولاد سامعة
الفلاحين اللي بنوا الجامعة
غني الصبابة والوطن والدين
والإنسانية تفتح الميادين
غني الحنان الصادق الدافي
وأنا احمل الدنيا علي كتافي
ألفين سنة في عيون البلد والدين
صوت الجهاد والصبابة والوطن والدين
وبهجة الإنسانية تفتح الميادين
وصنعة الشمس لما تزهر الفدادين
ويا دنيا عاودي يا دنيا قربي وطلي
حبيبي لابس شباب النور علي التلي
يا خدلي بالحضن غيط القطن ويقول لي
القلب الأبيض وطن
شمل الأحبة وطن
وانتي السبب والعجب واللمة والراحة
والليل حدانا ضفاير بنت فلاحة
والكل عندك يا ست متواعدين