كلمات أغنية أحمد مكي الجديدة "أغلى من الياقوت" جرعة نصائح للجمهور

طرح أحمد مكي أغنيته الجديدة "أغلى من الياقوت" أمس وحظيت بأعجاب الكثيرون من رواد مواقع التواصل الاجتماعى بمزيد من التعليقات الإيجابية عليها وعن ثنائهم بأداء الفنان أحمد مكي، وحققت أعلى نسب مشاهدة وتصدرت الترند منذ الساعات الأولى من بثها، حيث بلغت 3.5 مليون مشاهدة حتى الآن، وتحمل كلمات أغنية أحمد مكي الجديدة "أغلى من الياقوت" جرعة نصائح للجمهور بنمط "الراب" كما هو معتاد في أغاني "مكي" السابقة، ويقدم فيها مجموعة نصائح للأبناء فى مواجهة الحياة واصفًا نفسه بأب سمع خبر ميلاد طفله وبها عدة مبادئ وأخلاق يريد ترسيخها في ذهن من يسمعها، وبالفعل حققت الأغنية رجع صدي كبير عن الجماهير.
كلمات أغنية "أغلى من الياقوت"
يوم ميلادك يوم ما للدنيا انت جيت اول علاقتي بيك صوتك ما بيني و بينك حيط
سمعت صوتك استغربت اتلخبطت اتشديت قلبي اتنفض ما بين ضلوعى و م الفرحة بكيت
اول ما شوفتك الدنيا لفت بيا ربى حبنى و وهب ليا من عنده هدية
سرحت فيك ساعات فيك منى كتير حاجات يا رب تاخد منى بس الحلو فى الصفات
و ف وسط زحمة فرحتي فجأة هجم سكات مخلوط صور ابيض فى اسود م اللى عيشته و م اللي فات
يمكن عشان الضلمة فى طفولتي كانت اكتر من نور عيل صغير قال بسم الله و قام يعدي فى بجور
مش شايف شط او ميناء لاخر البصر مفيش امل كان نفسى فى حد يعلمني و ينصحني و يبقالي المثل
ربك حمانى و اتولانى برحمته مافيش جدل بعد ما كل سكة اتسدت و اسودت و الباب قفل
يا رب يا كريم اهدينى و قوينى و وفقنى لسكة تربيته على الشيء السليم
عارف اني مش مثالي بس طمعان في كرمك تخلي حاله احسن من حالي
و انا اوعدك يا رب ححاول ابقى احسن اب و اديه اللي ما شوفته فى نهر طفولتى اللي نضب
كل يوم بيعدي و اشوفك فيه بتكبر يتفاجىء إن صفاتي بتظهر فيك اكتر و اكتر
ابتسامتي و ضحكتي و المشي و حتى تكشيرتي حتى نومتك رجل فوق رجل دي نسخة من نومتي
قبل وجودك الدنيا ما كاتش فارقة معايا قلبي دة كان خلاص قلب حجر دي مش كناية
جلدي تخن من قسوة الدنيا و مر الحكاية بقيت زعلان على الشخص اللي شايفه فى المراية
لحد ما انت جيت غيرتني و كنت الهداية فتحت بإيدك كل ابواب الرحمة جوايا
لما بحضنك و احس دقة قلبي جنب قلبك مية في المية ما حبتش فى الدنيا قبلك
لما بحضر اول مرة ليك في اي حاجة قلبي بيرفرف و احس بألف حاجة و حاجة
احساس غريب جزء منى اتحول انسان بيزعل و بيفرح و بيزرع جوايا الحنان
خايف عليك من الدنيا يا ابني مالهاش امان و بدعي ربنا يحميك و يصونك هو الرحمن
كتبت رسالة ليك عشان لو قدري وقته حان و مش مكتوبلي اكون جنبك لاخر الامتحان
عاوزك تكون صاحب عزيمة فولاذ حديد مهما الدنيا تحبطك صمم خليك عنيد
خليك واثق فى نفسك عن حلمك اياك تحيد مهما اسود الليل و طال هيطلع فجر جديد
عاوزك لربك شاكر و جهد الناس تقدر و اوعى تظلم مهما كنت قادر ربك اقدر
اوعى تفضح عيب انسان لو ربك ستر كما تدين تدان ما تضمنش القدر
لو قولت كلمة حق و الناس قامت عليك كإنهم قالولك مبروك تسلم ايديك
عشان الكلب الميت ضربه مش مطلوب لكن لو كان شجر مثمر بيتحدف بالطوب
لو يوم ذنوبك تقلت ارجع لربك توب ربك لو حبك هيحبب فيك كل القلوب
ساعات بسرح و بسأل نفسي و الدماغ تفكر يا ترى حتبقى فعلا ضهري لما اكبر
لما العجز يبدأ ينهش فيا و يجور عليا فى عز احساسي بضعفي هيكون قلبك عليا
لما اللسان يتقل و الكلام يصبح بطيء و اعيد نفس الكلام اكتر من مرة ارجوك تطيق
ياما طلبت مني اعيد حكي الحدوتة كتير و فى كل مرة اعيد لك قلبي كان بيطير
لما تلاقيني قدمت و مش مواكب عقل جيلك ما تركنيش لجهلي علمني من غير ما اجيلك
خليك عينيا نورلي طريقي لمنتهاه و افتكر اني من علمك معنى الحياة
لما ابطل اقدر امشي لوحدي خطوتين لما اكون اضعف من انى اقدر اشرب من غير معين
لما تموت الذاكرة و بالعافية اعرف انت مين وجودك جنبي كفاية لحد ما يجيني اليقين
كلمتين حقولهم عندي اغلى من الياقوت كنت معاك يوم ولادتك عاوزك جنبي يوم ما اموت
اقرأ أيضًا.. منع آمال ماهر وأعمالها من الظهور على القنوات والإذاعات المصرية
ويذكر أن كلمات أغنية أحمد مكي الجديدة "أغلى من الياقوت" من توزيع شادي السعيد، ويتألق "مكي" بكتابة الكلمات والإخراج.