عبلة كامل: أنا كويسة ومش محتاجة أتعالج على نفقة الدولة.. وعملت عمليات كتير من نفقتي الخاصة

وأعلنت لميس الحديدى عبر برنامجها «الصورة» أن الفنانة بخير والصور المتداولة لها هى بالذكاء الاصطناعى، ولكن الفنانة حرصت على طمأنة جمهورها على حالتها الصحية.
واستهلت الفنانة عبلة كامل رسالتها الصوتية بتوجيه الشكر للرئيس عبد الفتاح السيسى، قائلة: «بشكره على تبنى علاج الفنانين على نفقة الدولة، وأنا تفاجأت بقراراته، وهى لفتة حنونة وهايلة منه، وسعدت بها جدًا».
ووجهت كامل رسالة طمأنة لجمهورها، عبر برنامج الصورة المذاع على شاشة النهار، قائلة: أنا بطمن الناس اللى بحبهم وبيحبونى، أنا كويسة وبخير، كنت عملت عمليات قبل كده وبقيت كويسة، والعمليات السابقة كانت على نفقتى الخاصة، وأنا مش محتاجة حاجة، وإن شاء الله كلنا على بعضنا نبقى أصحاء ومش محتاجين حاجة بإذن الله، ونفضل بصحة.
وواصلت: أنا بشكر كل الناس اللى دعولى، وبقولهم إن شاء الله الملائكة ترد عليكم وتقولكم: ولكم بمثلها.
ووجهت الفنانة ما قالت إنه رسالة عتاب لبعض من كتبوا على مواقع التواصل الاجتماعى: عبلة كامل مش محتاجة علاج، مش لازم تتعالج على نفقة الدولة، قائلة:« أنا بحبهم برضه، بس بوجه لهم رسالة عتاب وبقول:» رفقًا بالقلوب، وأنا مسامحة، وكلنا مسامحين بعض، وكلنا نبقى كويسين بإذن الله".
وكررت الفنانة عبلة كامل توجيه الشكر فى تسجيلها الصوتى للرئيس عبد الفتاح السيسى، قائلة: لفتة كريمة منه وبشكره جدًا.
وبخصوص وجود أى حسابات شخصية لها على مواقع التواصل الاجتماعى، قالت: «ما عنديش أى حساب أو صفحة على مواقع التواصل الاجتماعى، ومش هيبقى عندى لغاية ما أقابل وجه كريم، ومش هيبقى عندى صفحات».
وأردفت: أنا دائرتى مغلقة جدًا، وقافلة على نفسى، ومن حولى دائرتهم مغلقة، أى تصريح مش عن لسانى ولا لسان من حولي".
واختتمت رسالتها قائلة:« لميس يا حبيبتى أنا متشكرة جدًا، وبشكر القائمين على البرنامج، وكلنا هنبقى بخير، ولا إله إلا الله محمد رسول الله.