تامر حسني لحسام حبيب: أوعدني قدام الناس إنك ترجع تاني

أبدى الفنان تامر حسني سعادته البالغة بالإشادة التي تلقاها من الفنان حسام حبيب، بعد نجاح أغنيته الأخيرة مع الفنان رامي صبري، التي تحمل اسم 'فعلاً مبيتنسيش'.
وأعاد تامر حسني نشر رسالة حسام عبر خاصية القصص القصيرة على حسابه الرسمي بموقع تبادل الصور والفيديوهات الشهير 'إنستغرام'، مرفقًا بتعليق يشجعه فيه على العودة إلى الساحة الغنائية مجددًا.
وكتب تامر حسني في خاصية 'ستوري' إنستغرام: 'حبيبي يا حسام، إيه الكلام الجميل ده؟ طول عمرك محترم وإنسان نضيف وفنان كبير. لو استفزناك بجد، يلا ارجع زي الأول وأكتر. ارجع متعنا بأغانيك الراقية الجميلة والمزيكا الأجمل، لأن ليك جمهور كبير بيستنى شغلك وأكيد ليهم حق عليك. يلا صفحة جديدة مع مشوارك من النهاردة، يلا اوعدني قدام الناس إنك ترجع تاني.'
يُشار إلى أن حسام حبيب وجه رسالة شكر إلى النجمين تامر حسني ورامي صبري عبر 'إنستغرام'، وأثنى على نجاح أغنيتهما الأخيرة قائلًا:
'أنا بكتب كلمتين من قلبي مش عارف هي مباركة ولا شكر ولا درس وبداية جديدة لجيل أنا فخور إني أكون منه. تامر، انت من زمان وأحلامك وأفكارك كانت دايمًا تخص جيلك، ودائمًا كنت بتتكلم معانا باسم جيلنا مش باسمك فقط. فهمت النهاردة إنك نجم حلم لجيله مش لنفسه، وحلمك بيتحقق.'
وتابع حسام حبيب: 'رامي أخويا وصاحب أجمد صوت وإحساس، حلمه كان دايمًا جمع الجيل ده وتقديم فن صادق للناس. النهاردة حققتوا ده في أغنيتكم اللي مش بس كانت إبداع في الموسيقى، لكن في الروح والفكر كمان.'
واختتم حسام قائلًا: 'أنتم فرحتوني وأمتعتوني وخليتوني أفتخر إني من الجيل ده. شكرًا إنكم فتحتم نفسي ورجعتوني أحب المزيكا يمكن أكتر من الأول. أنتم فعلاً مِتتنسوش.'