«وتقولوا الدولار غلي ليه».. الرئيس السيسي يعلق على ارتفاع التكلفة الاستيرادية للسلع غير الضرورية

تحدث الرئيس عبدالفتاح السيسي عن التكلفة المالية لبعض المنتجات المستوردة، غير الضرورية مثل: الشيكولاتة، وأوراق الفويل، العطور.
وقال السيسي، خلال كلمته في افتتاح مشروعات جديدة في قطاع النقل منها محطة قطارات الصعيد في بشتيل، المذاع عبر فضائية 'اكسترا نيوز'، اليوم السبت، إن كلفة استيراد الأدوية تقدر ب23 مليار دولار.
ووجه الرئيس السيسي الدعوة إلى المستثمرين ورجال الصناعة، إلى البدء في إنتاج المنتجات التي يتم استيرادها من الخارج، قائلًا: 'يا أهل الصناعة يا مستثمرين يا رجال الأعمال يا اللي شغالين في البنوك والاستثمار اللي قدام منكم عبارة عن فرص عمل ليكم لأن كل منتج من ده دفعنا فلوسه بالدولار علشان نجيبه لمصر'.
وأضاف: 'تكلفة استيراد تليفون المحمول 9 مليارات دولار، الناس بتستسهل بدل ما يجيب الكلام ده ويعمله في مصر ويخش في متاهات مع أرض وتمويل ونقل تكنولوجيا من بره علشان ينتج اللى بنقول عليه ده، يقول اشتريه أسهل والدولة محاولتش تشتغل بجدية وصلابة وصرامة'.
وتابع: 'استوردنا عطور ومزيلات عرق وورق توالي 440 مليون دولار.. شيكولاته 400 مليون دولار..235 مليون سيراميك وبتلومني وتقولوا الدولار غلي ليه؟، منقولش نقفل البلد يعني.. ورق الفويل 500 مليون دولار.. ليه ما بنعملوش؟ ..الجبنة 1.2 مليار دولار.. نقول للناس مش عارفين نعمل مصانع ننتج الحاجات اللي الناس عاوزاها'.
وأكمل: 'الحلول معانا إحنا كمصريين كرجال أعمال.. هناك فرص عمل لإنتاج المنتجات دي لمصر وتبيعه وناس بتشتغل وناتج محلي وشوية ضرايب للدولة.. السيارات 25 مليار دولار معقول مش قادرين نخلي شركات السيارات تنتج سيارات في مصر نستورد بس نسبة'.
وأتم: 'إذا كنتم عاوزين تتجاوزا تحدي الدولار لازم نسبة كبيرة من هذه المنتجات يتم تصنيعها في مصر، وده أمر مش سهل، وبدعم الحكومة حتى تخرج هذه المنتجات في أقرب فرصة'.