محمد ممدوح يتحدث عن كواليس مشاركته في فيلم «إكس مراتي»

كشف الفنان محمد ممدوح عن كواليس دوره في فيلم 'إكس مراتي'، حيث من المقرر المشاركة به في الموسم الصيفي خلال الفترة المقبلة بدور العرض السينمائي وهو بطولة كلا من تايسون وهشام ماجد وأمينة خليل ومن إخراج معتز التوني.
فيلم "إكس مراتي"
وقال محمد ممدوح في حواره عبر سكايب مع بودكاست دردشات والمذاع على فضائية المشهد عن مشاركته في فيلم إكس مراتي للمخرج معتز التوني قائلًا: الورق شجعني أوي، ومن زمان كان نفسي أشتغل مع هشام ماجد وحاجة تشرفني لأني من معجبين هشام وبحب أتفرج على أفلامه وشغله ومعتز التوني مخرج خطير، والمنتج أحمد يوسف أخويا والورق حلو وهشام ماجد الجندي المجهول في الفيلم لأنه اشتغل على الورق كتير مع المؤلفين وأنا اتبسطت جدًا واكتشفت صديق وهو فنان كبير حقيقي وملهم وبيفكر وخطير إلى جانب أنه جدع وراجل، والفيلم مأخوذ عن قصة فيلم أجنبي واتمصر.
عودته للكوميديا
وعن عودته للكوميديا واللايت أوضح أنه لا يفرق معه طبيعة العمل بقدر اهتمامه بالنص، قائلًا: الورق الحلو لما يعجبني بوافق وبحس إني بعمل حاجة جديدة ومش بيفرق معايا كوميديا أو تراجيديا وبحترم دماغ الناس في الشغل وبحاول أقدم حاجة جديدة ودي حاجة مهمة للصناعة.
التعاون مع أمينة خليل
وعن التعاون مع أمينة خليل في أكثر من عمل وآخرها فيلم إكس مراتي وأهل الكهف أضاف: أمينة خليل فنانة شاطرة ونجمة كبيرة، والنجم ده من رأي طريقة تعامل وتصرف وطريقة تناول واختيار مش مجرد الناس بتشاور عليه، لكنه لقب كبير وهي تستحقه وهي نجمة بتدخل المكان بتوه وبتعرف أزاي تختار وبالصدفة البحتة بيتم اختيارنا في أعمال فنية مع بعض وهي شاطرة وبتترسخ في كل الأدوار، واتحدت نفسها في فيلم شقو.
التعامل مع المخرج معتز التوني
وتحدث محمد ممدوح عن تعاونه مع المخرجين أحمد الجندي ومعتز التوني في أعمال سابقة قائلًا: الاتنين مخرجين كبار وأسامي كبيرة ومفيش اختلاف وكل واحد له طريقته في التعامل مع الممثل أو الاسكربت وأحمد جندي علامة مميزة بالنسبة لي وعملت معاه بنك الحظ وكل ما اشتغل معاه الحاجة بتكون خطيرة وله ملحوظات هايلة وهما الاتنين أساتذة كبار وهما كمان صحاب فشبه بعض جدًا ودي حاجة ممتعة ومعتز مرن جدًا والتغيير بالنسبة له حاجة مهمة جدًا.
التوازن بين حياته الشخصية وعمله
وكشف محمد ممدوح عن كيفية توازنه بين حياته الشخصية وعمله في التمثيل قائلًا: ساعات مش بنجح بس بحاول وأهلي بيراعوه ده ومراتي بتراعي ده لكن كاميليا بنتي بدأت تثور عليا وبكون عاوزة أقضي معاها وقت كتير وده هيكون مفيد ليها وليا أنا كمان نفسيًا، والفترة اللي فاتت كان فيه زحمة بس كانت متفرقة على كذا سنة.