علق إبراهيم سعيد، نجم الأهلي والزمالك ومنتخب مصر السابق، على استبعاد محمد الشناوي، حارس مرمى الفريق الأول لكرة القدم بالنادي الأهلي من مباراة بلدية المحلة. وقال إبراهيم سعيد في تصريحات تلفزيونية عبر فضائية «النهار»: «الشناوي، عاوز يلعب ولكن في التوقيت ده صعب جدًا، المدير الفني صعب يقعد مصطفى شوبير، بعد تألقه والمستوى الذي ظهر عليه في المباريات الماضية، مفيش حد في مصر مبيدعمش مصطفى شوبير، لأنه يستاهل، احنا مش بنجامله، هل كل الناس اللي بتشيد بيه بتجامله عشان والده الكابتن أحمد شوبير؟ مش ممكن الكورة مفيهاش مجاملة خصوصًا النادي الأهلي معندوش حتة المجاملة لأن في جمهور كبير جدًا بيحاسب». وأضاف: «استبعاد الشناوي، من مباراة بلدية المحلة، معناه إن كان في كلام فعلًا أنه عاوز يشارك، صعب جدًا يا شناوي، بصراحة أنت نجم كبير وحارس مرمى كبير جدًا ولكن دي سنة الحياة، سنة الحياة جيل بيسلم جيل». وتابع: «حق مشروع تطلب المشاركة بس التوقيت مش صح، مينفعش انك تيجي بعد فترة إصابة طويلة وتبقى عاوز تلعب، ده مش عدل، طبيعي مصطفى شوبير، هو إللي يكمل حتى نهاية الموسم». وأردف: «كنت أتمنى محمد الشناوي، يبقى موجود لأمرين، يكون عندك حارس مرمى كبير، حتى لو قعد احتياطي مش عيب، كلنا قعدنا احتياطي، أبوتريكة قعد احتياطي وعصام الحضري ونجوم كتيرة جدًا قعدت احتياطي ده مش عيب خالص».
