زوج ميك أب ارتيست المحلة: كل كلام العروسة كدب وعايزة تبقى تريند

ضجت مواقع التواصل الاجتماعي خلال الساعات القليلة الماضية بواقعة عروس وميك أب أرتيست المحلة الكبرى، بعد ما نشرت فتاة تُدعى 'آلاء العزب' 22 عامًا، حاصلة على بكالوريوس تجارة، عبر صفحتها الشخصية على 'الفيسبوك'، قصتها بإجبارها على غسل وجهها وإهانة ميك أب أرتيست لها تدعى 'نورا. ب' مالكة مركز تجميل، بسبب خلافات على عرض باكدج ميك أب سواريه وتكلفته 450 جنيه بينما الخطوبة يقترب من 1500 جنيه، ونزولها لزفتها بدون مكياج لاكتشاف صاحبة المكان أنها عروس.
عروس المحلة
وفي أول رد له على الواقعة، قال محمد طارق، زوج الميك أب أرتيست، إن زوجته منذ حدوث الواقعة وهي محتجزة بالمستشفى بعد الهجوم عليها والتعليقات السلبية التي انهالت عليها عبر مواقع التواصل الاجتماعي، 'مراتي كانت هتروح فيها من الزعل، وكل كلام العروسة محصلش'.
وأضاف زوج ميك أب أرتيست المحلة: 'لو العروسة صاحبة حق ليه طلعت من أكونت فيك!'، متابعًا: 'زوجتي لم تُجبرها على غسل الميك أب، وعندما اكتشفنا موضوع الخطوبة قالت لها: اقعدي معايا نص ساعة هعملك ميكب أب أفضل وبعض الأشياء ليكون لائقًا بالخطوبة'.
زوج ميك أب أرتيست المحلة
وتابع: 'العروسة كانت تتعامل معنا بأسلوبٍ غير لائق، وزوجتي طبطبت عليها وقالتلها مش هنزلك زعلانة وكل اللي عايزاه هعملهولك، فوجئنا بردها: أنا مش فاضية للقرف بتاعكم ده، انتوا محتاجين إيه يعني لو عايزين 500 ألف جنيه هتاخدوهم على الجزمة القديمة، وخرجت ورزعت باب الغرفة، وقالت: أصلًا كدا كدا الميكب أب مش عاجبني'.
وأكمل: 'اتصدمت بردها وطلّعت ال500 جنيه وقولتلها باحترام لو مش عاجبك الميك أب اتفضلي حضرتك اللي دفعتيه وتقدري تدخلي تمسحيه، فنادت على السكرتيرة وقالت لها بأسلوب غير متحضّر: تعالي امسحيلي اللي انتي عاملاه ده، فردت عليها بأن مسح الميك أب ليس من شؤون عملها، فدخلت غسلت وجهها'.
واختتم حديثه قائلّا: 'محدش قالها يا تمسحي الميك أب يا تدفعي فلوس زيادة، وتواصلنا معها بعد نشرها البوست واتعاملنا معها ماديًا لحذفه رفضت وواضح إنها حابة تكون تريند'، متابعًا: 'لو حد له عندنا أي شكوى أو مظلمة مكتبي مفتوح، وسيبونا في حالنا كفاية ظُلم وتطاول بدون وجه حق'.
وكانت روت الفتاة آلاء العزب عروس المحلة، خلال منشورها، قائلة: 'أنا بجد بشكر كل الناس اللي دافعت عنى.. ثانيا يا جماعة أنا اليوم عدى على خير وأنا نزلت من عندها قولت في سري بس حسبي الله ونعم الوكيل وأنا روحت البيت وعملت ميك أب لنفسي وتصورت سيشن وكانت الخطوبة حلوة'.
وأضافت: 'الموضوع أصلا نسيته ومكنش في بالي خالص ولا متابعة أي حاجه علي الفيس بوك وأنا مسامحاها عادي لان عرفت ان هي فعلا تعبت وربنا يشفيها وفالأول والآخر ده مصدر رزقها وعمري ما أكون سبب في قطع عيش حد وربنا يعوضها خير'.
من ناحية أخرى، كانت إحدى صفحات صالونات التجميل، نشرت فيديو تحذر فيه من استغلال عروض المكان، وأن إحدى الفتيات استغلت عرض الميك أب سواريه رغم أنها عروس وعند اكتشاف المكان كونها خطبة طلب منها أصحاب المكان غسل وجهها ورد المبلغ المالي أو دفع 1000حنيه، إلا أن العروس رفضت وغسلت وجهها، ولاقى المنشور غضب رواد 'السوشيال ميديا' وانهالوا تعليقات ساخرة وساخطة على صاحبة صالون التجميل، مما اضطرها لإغلاق صفحتها على ال'فيسبوك' وقال البعض أنها تعرضت لأزمة صحية.