فريدة سيف النصر: محمد رمضان عنيد وكياد.. وسميرة عبد العزيز تتعامل بأسلوب فاتن حمامة

دافعت الفنانة فريدة سيف النصر عن الفنان محمد رمضان في رسالة لها نشرتها عبر حسابها الشخصي على موقع التواصل الاجتماعي فيس بوك، وتحدثت أيضا عن أزمته مع الفنانة سميرة عبد العزيز بعد تصريحها بأنه أهانها في رسالة تليفونية بعد رفضها تقديم دور أمه في أحد الأعمال الفنية.
وقالت فريدة سيف النصر: "كلمة حق لرمضان.. حواديت حصلت قدامي، ماحدش يقوللي هاتخسري جمهورك وأنصحك ماتدافعيش عنه، نصيحة مايعلقش أحسن علشان لا أنت ولا غيرك هاتنفعني يوم وقفة الحق، والساكت عن الحق شيطان أخرس وكتم الشهادة نار تقيد في القلب تسوده.. وعنده عيوب اه لكن متربي واللي بيحترم أبوه وأمه بيحترم الكبار، وولا حد يقوللي بتطبلي له والسبوبة خلصت، يا بني الشغل اللي أنا اشتغلته مع كل النجوم الكبار يخليني أكره وأحتقر الوسط واللي بيحصل فيه دلوقتى، فمش عايزه تعليقات كلها هري وبس".
وأضافت: "وتاني هو فيه عيوب آه وكلنا عيوب.. يلا وهقولها له لأول مرة.. عيوبك (عنيد، صوته من دماغه، متهور، كياد.. بيفرس ناس قهروه وبيظهر نعم الله عليه، ما استعانش على قضاء حوائجه بالكتمان نصيحة النبي، وبيجيب لنفسه ولأهله القر، والناس اللي بتغير وتكره الخير للناس يتشالوا ويتحطوا من غير ما يؤذي حد، ده ليه لأننا مختلفين، كل الدنيا والعالم الناجحين اوي بيفرحوا لهم احنا لأه يردحوا لهم، هو كان فاكر زي ما بيفرح الناس ها تفرح له، وقدامكم مثل محمد صلاح اتكرم في العالم كله في مصر لو ماكانش جرى كان اتدمر خالص، يخرب بيت كده احنا مكناش كده جرالنا ايه، دي في ناس بتدعي بزوال النعم يا ساتر يا رب".
اقرأ أيضا فريدة سيف النصر تهنئ محمد فراج ومحمد على رزق بزفافهما
وتابعت: "أما السيدة الفاضلة جيل فاتن حمامة وصديقتها الوحيدة سميرة عبدالعزيز احتراما لها لن أكذبها أبدا يعني كتمتي في قلبك 6 سنين؟، وبعدين دي مش شغلته أن حد يرفض دور فايتقهر ويكلمه يردح له، يعني حتي لو حصل اشمعني دلوقتي يا حاجة لا حول ولا قوة إلا بالله العلي العظيم.. أنا اتشرفت بيها وعملت معانا في مسلسل الرحايا اخت نور ابو دياب زوجي واتقابلنا كتير كانت ماليه الشغل علينا أسالوا الجميع والله حاجه كده خيال بتتعامل حقيقي بأسلوب فاتن حمامة شوفوا بقي الرقي ماهو قول لي من تعاشر، ربنا يهدي الجميع لبعض ويهدي النفوس هو احنا بندور علي مشاكل بأثر رجعي، والله ما مستاهله حقك عليا انا ولو ان اقسم بالله قسم يتهز له 7 سموات دي مش اخلاق محمد، واللي هايقول سبوبه وقرف ورحمة أمي هازعل لانكم حبايبي وعارفين اني حقانيه ومابياخد الروح إلا اللي خلقها..واشكركم".
اقرأ أيضا فريدة سيف النصر عن رحيل سمير غانم: زمايل عشرة عمرك تحس إنهم زي البيت اللي حيطانه بتقع