شروق تطلب الخلع: بيعذبنى بسبب خيانة أمى لوالدي ويقول لي أكيد شبهها

لم تتخيل شروق البالغة من العمر 26 عاما أن زوجها سيأخذها بذنب والدتها التى قامت بالهرب مع عشيقها ويتهمها بأنها مثلها على الرغم من أنه يعرف أخلاقها جيدا ولكن الشيطان أقوى منه حيث جعله يتعامل معها بوحشية وضرب وتعذيب طوال الوقت على أتفه الأسباب مما جعلها تقف داخل محكمة الأسرة لرفع دعوى خلع من زوجها بعد عام و8 شهور، مبررة ذلك بقولها "أنا عارفة ان أمى ارتكبت غلط كبير أوى ومش تجاه أبويا بس لكن ذنبنا احنا كمان، كسرت نفسنا قدام الناس، لدرجة ان جوزى جابلي عقدة نفسية من كتر الضرب فيا بسببها والشك انى أكيد هبقي زيها، بس ربنا يعلم أنا بحافظ على بيته وكرهتهت بعد اللى عملته".
قالت الزوجة في مستهل حديثها مع "أهل مصر": اتجوزت من سنة و8 شهور، كان جواز صالونات وكنت مبسوطة الحمد لله وراضية، وجوزى كان بيعاملني كويس جدا ومش بيحرمنى من حاجة حتى معاملته مع أهلى كانت طيبة جدا، وكنت بحلم باليوم اللى أخلف منه لكن فى يوم وليلة اتغير الحال وحياتى اتحولت لجحيم بسبب والدتى الله يسامحها اللى كسرت نفسي أنا وأبويا وأخواتى وخلتنا مش عارفين نرفع راسنا قدام أى حد، لما أخدت فلوس والدى الشقيان وهربت مع عشيق ليها ورفعت على والدى قضية خلع، وكاميرات المنطقة صورتها وهي ماشية مع واحد فى نص الليل، وكانت صدمة صعبة لينا كلنا ووالدى تعب واتنقل المستشفي، وأنا كنت فاكرة ان جوزى هيقف جنبي لكن اتغير معايا تماما.
وتابعت حديثها قائلة: بقي يعاملنى كأنى زيها وبخونه، الشك بقي عايش معانا حتى التليفون أخده منى، على أتفه سبب أو من غير سبب يضربنى لدرجة التعذيب مع أبشع الألفاظ ليا ولأمى، على الرغم انه عارف انى بصلي واستحالة أكون زيها، لكن مافيش فايدة بقيت عايشة فى جحيم وذل جوة وبرة البيت، عشان كدا قررت أبعد قبل ما يكسرنى هو أكتر من كدا، ورفعت عليه دعوى خلع ومازالت الدعوى منظورة أمام القضاء.