آخر الليل

بلاد الحُبّ منسية
وقلب أبيض من الوردة
تجيبه شمال تجيبه يمين
كتير بيموت من الخضَّة
ساعات يضحك وهو حزين
ساعات يفرح
وجوّه قليبه حزن سنين
ساعات يحضن شوارع الكون
ساعات يقفل عليه بابه
وياخد الحُزن ف جنابه
ويبكي كتير
أتاري الدنيا قسَّاية
ووقت الفرح نسَّاية
ولو نضحك تزيد تكشير
وساعة أشوفها عِنَديِّة
بنزرع تقطع المَيَّة
بترسم فرحة مش هيِّه
وقلب البنت حدّوتة
وقلب الطفل ..
عازف فرحه ع النوتة
وقلبي كتير بيجمعهم
وتبقي الضحكة دي توتة
يتوهوا ساعات ما بين ليّام
ويجي الحزن حاضنهم سنين قدّام
ياضحكة يا اللي هاربة بعيد
بُصِّي تاني ف المواعيد
وخلّينا ف جدول حتي آخر الدور
أنا عارف ..
بإن إنتي بتدوري
ونسيانا ولينا عصور
أنا نفسي ..
تكون الضحكة كتاباتي
ف كل سطور
أنا عارف ..
بإني زيّ كتير فيكي
وإني بَحب معاليكي
وإنك غاوية مرمطتي
وبأتغرب بعيد عنك ..
وأعود ليكي
فلو نظرة
أنا قابل تكون حتي علي الماشي
أنا قابل أكون ضحكة
جميع الخلق يضحكها
ولو نفسي ماضحكاشي
أنا قابل أكون فرحة
لطفلة بريئة ف الشارع
تبيع الورد
وتبني للحزين غنوة
تكون له السد
م الأحزان وم التّوه
وأنا قابل أكون ألحان
وقابل إني أكون برضه
قصايد شعر تتغني ولا تتخان
أنا قابل أكون موال
لمطرب كل أحلامه
يقول يا ليل