مية المحاياة

ما بين الخطوه والخطوه سواقي تدور
بكاس بنور
ملان فضه
حنتوضي..
ونروي البور
ما بين شتلاية تتحدي جنون الريح
وطفل فصيح علي صدره جراب مسحور
أخويا محمد المصري
سند عصري
مدد عصري
شرب..
من مية المحاياه
فرد عوده علي حدوده
وقال: الله!!
عليك يا أرضنا الخضره
شرب من نبع أجدادي
بكاس مينا وكاس أحمس واخناتون
ايديه بتحس احساسي
عنيه البحر.. مدرستي وكراسي
شفايفه زهرتين ليمون
يشوف بكره
بلون الطمي والغله
بلون الحضن والضله
بلون تسبيحه أو دعوه..
لرب الكون
اخويا محمد المصري
يلف الكون
بحدوته..
وتورته توزع الفرحة لكل الناس
أمل ينباس
ويبقي أساس
لمهره..
ع المدار شقره
تلف تدور
وكلب بيحرس البقره
تمللي يثور
اذا اتاخد بلون تاني
عشان صاحي وحقاني
ما هوش حاقد ولا مغرور
وقول يا شاعر الأرغول
وطمن قلبنا المشغول
علي الترعه
وصفصافه تضفر شعرها وتميل
علي الميه
تصحي الموج..
ملاغيه
بتروي اللحن والمواويل
وقول يا شاعر الأساطير
وهات من بدري واشجينا
وروح بينا واحنا صغار
معانا حنا وهدايه
بنلعب استغمايه
علي ناصية ولاد الفار
نشوف عبدالغني المجذوب
نموت وندوب
وابونا صابر المصري
ياخدنا بين جناحاته..
نخش الدار
يقول: يا ولاد معاد نومنا
معاد الراحة يا شطار
ورانا بكره ميت شغله
محمد يركب البغلة
وعبدالله وراه بحمار
وكنا صغار
ومش فاهمين
وابونا بس خايف
وكان شايف
مخبي فينا ألف نهار
لحم أمي
نسيم الطيبة والعفه
وطرح الموجه والدفه
بخفة دمها تشفي..
عليل الحيره والأسفار
بتحلم زوجة لمحمد
هتملي الدار
عيال وعمار
وعبدالله وراه بسنتين
ما قلتش: لأ
ضحكنا والفؤاد انشق
- راح استني كما سنتين؟
- معاد القطن والنوار
ح ندعي الكفر والعيله
وكام ليله
نقيم الفرح في الحته
نقيد الشمع والأنوار
شربنا مية المحاياه وشبينا
وبابنا للضيوف مفتوح
شبابيكنا ترد الروح
حمام البرج جوز ورا جوز..
يهنينا
فردنا الحلم بايدينا
علي المادنه
قبال بيتنا
مافيش فينا فؤاد مجروح
مادام الحب حارسنا
وضليلة علي ناسنا
مكان ما نروح
شربنا سلسبيل النيل
بلدنا كل يوم يا جميل
تحب تميل
علي العاشق
وتفرد له جناح.. ويطير!