دخلت المنزل فوجدت المفعوص أبو نص لسان حزينا مهموما، منزويا في ركن الصالة، واضعا رأسه بين يديه، في مشهد لم آلفه منه، وغير معتاد عليه.. فاعتقدت أنه لم يحصل على الدرجات النهائية في امتحانات "الميني تيرم".. فأقبلت عليه وقلت له: - خيرها في غيرها.. وإن شاء الله تعوضها في امتحان نص السنة.. - حضرتك بتتكلم عن إيه يا بابا؟! - عن درجات "المينى تيرم".. شكلك مجيبتش الدرجات النهائية زي عوايدك؟! - يا بابا أنت ناثي إني طلعت الأول..!! - أومال إيه إللي مزعلك كده.. ومخليك واخد جنب..؟ - إيه اللي بيحثل للقضاة في البلد دي.. وبيتعاملوا كأنهم قطاع طرق ومثجلين خطر.. وكله كوم وإرهاب قضاة المحكمة الدثتورية كوم تاني.. - عاوز الصراحة.. القضاء فيه بعض القضاة الفاسدين والمرتشين، واللي معندوهمش ضمير وياكلوا مال النبي.. يعني مش كل القضاة ملايكة.. - أكيد يا بابا.. ولكن برضو كلهم مش شياطين.. وأغلبهم قضاة كويثين ومحترمين.. ولو فضلنا نشكك في كل قاضي هنلاقي نفثنا قدام 90 مليون قاضي.. عشان كل واحد فينا هيكون قاضي نفثه.. ويحكم بقى بمزاجه وعلى هواه.. - أنا معاك إن فيه قضاة شرفا.. وأبسط مثال على كده الناس اللي في تيار الاستقلال.. وقضاة من أجل مصر.. ودول بقى مفيش فيهم ولا كلمة.. - حتى إنت كمان يا حج مخدوع فيهم.. وأنا اللي كنت فاكرك بتفهم وطالع حدق زي ابنك.. دول بقى تثميهم تيار اثتغلال القضاء.. وقضاة من أجل "الإخوان".. وقضاة من أجل "مرثى"، وقضاة من أجل "الكرثى".. - حرام عليك.. إنت جاي على أشرف ناس في القضاء وتشوه صورتهم.. - هما اللي شوهوا نفثهم وفضحوا نفثهم قدام الشعب كله.. غيروا مواقفهم.. ونفضوا للقضية اللي كانوا بيحاربوا "مبارك عشانها.. ودلوقتي بقوا مظبطين مع جماعة الإخوان والريث مرثي.. الجماعة تقول ولا الضالين يقولوا هما آمين.. مكتب الإرشاد يقولهم يمين يبقى يمين.. شمال يبقى شمال.. - مش للدرجة دي؟! - لأ.. للدرجة دي وأكتر كمان.. طيب ليه مشفناش ولا واحد منهم قال كلمة حق توحد ربنا عن حثار المحكمة الدثتورية.. وليه محدش طلع منهم وقالهم عيب اللي بيحثل عند مجلث الدولة.. ولّا هما شاطرين بث يشرفوا على الاثتفتاء على الدثتور اللي متغرق بدم الشهدا.. ومنشكحين قوي وهما بيعلنوا نتيجة الاثتفتاء المزور.. - يا بني يمكن ميعرفوش باللى بيحصل دا كله..!! - والله باين عليك يا حج إن إنت اللي مبتعرفش..!